चालू आर्थिक वर्ष ०७८/७९ को ४ महिनाको अवधिमा तनहुँमा ९२ फरार प्रतिवादी पक्राउ परेका छन् ।

जिल्ला प्रहरी कार्यालयले साउनदेखि कात्तिकसम्म जिल्ला अदालतबाट विभिन्न मुद्दामा सजाय तोकिएर फरार रहेका ९२ फरार प्रतिवादी पक्राउ गरेको हो । 

पक्राउ पर्नेमध्ये ८० पुरुष र १२ महिला रहेका प्रहरी नायब उपरीक्षक (डीएसपी) युवराज तिमिल्सिनाले जानकारी दिए ।

पक्राउ परेकालाई ७३ वर्ष ८ महिना २९ दिन कैद भुक्तानका लागि कारागार चलान गरिनाका साथै उनीहरूबाट २८ लाख ८३ हजार ३५५ रुपैयाँ जरिवाना असूल गरिएको छ ।

प्रहरीले यसअवधिमा विक्रम संवत् २०२५ वैशाख १४ गते फैसला भई हालसम्म फरार रहेका एक प्रतिवादीलाई २६ वर्षपछि पक्राउ गरेको थियो । फरार प्रतिवादी पक्राउ अभियान विगत २ वर्षदेखि सञ्चालित छ ।

प्रहरी कार्यालयमा चालू आर्थिक वर्षको ४ महिनामा १५४ मुद्दा दर्ता भएकोेमा ५२ मुद्दा फछ्र्योट भएको र  १०२ मुद्दा फछ्र्योट हुन बाँकी छ । प्रहरीले यसअवधिमा विभिन्न मुद्दाका ८९ जनालाई पक्राउ गरेकामा १ जना फरार छ । पक्रिएकामध्ये २४ जना पुर्पक्षका लागि थुनामा गएको प्रहरीले जनाएको छ । 

४ महिनाकै अवधिमा ११ जनालाई लागूऔषधसहित पक्राउ परेका र उनीहरूबाट ११४ थान डाइजेपाम, ११४ थान फेनरागन, ११३ थान नुफिन र १० किलो ८५५ ग्राम गाजा बरामद भएको छ । प्रहरीले सोही अवधिमा १५५ रोपनी क्षेत्रफलमा उम्रिएका २२ हजार ३०७ गाजाका बोट नष्ट गरेको जनाएको छ ।

५ वटा जुवा मुद्दामा ६८ जनालाई पक्राउ गरी ११ लाख ७५ हजार ९१० रुपैयाँ नगद बरामद गरेको प्रहरीले कोरोना भाइरस नियन्त्रणका लागि ‘तपाईंको मास्क खै’ अभियानअन्तर्गत ४७ वटा कार्यक्रममार्फत ९ हजार ५३५ जनालाई मास्क वितरण गरेको थियो ।

अवैध नदीजन्य पदार्थ नियन्त्रणतर्फ ४ महिनाको अवधिमा १ डोजर, २ स्काभेटर, २ जेसीबी, १० टिप्पर र ३७ ट्रयाक्टर गरी ५२ वटा सवारीसाधनलाई नियन्त्रणमा लिएर ४ लाख ७६ हजार ५०० रुपैयाँ जरिवाना असूल गरिएको पनि बताइएको थियो ।