युक्रेनका राष्ट्रपति भोलोदीमीर जेलेन्स्कीले आफूविरुद्ध रुसले कू गराउन खोजेको आरोप लगाएका छन् । 

देशका एक शीर्ष धनाढ्य पनि त्यस षड्यन्त्रमा सामेल रहेको उनको भनाइ छ । 

पत्रकार सम्मेलन गरेर जेलेन्स्कीले व्यापारी रिनात अखमेतोभसँग मिलेर रुसले कू गराउन खोजेको जानकारी दिए । 

कूका लागि १ अर्ब डलर खर्च गर्न लागिएको र त्यो डिसेम्बर १ वा २ मा गरिने बताइएको छ । 

अखमेतोभसँग निकट रहेका मानिसहरूको रेकर्डिङ आफूले पाएको राष्ट्रपति जेलेन्स्कीले बताए । 

‘हामीसँग सूचना मात्र छैन, अडियो इन्टरसेप्ट पनि छ । त्यसमा युक्रेनका प्रतिनिधिहरूले रुसका प्रतिनिधिहरूसँग कुरा गर्दै युक्रेनमा गरिन लागेको कूमा रिनात अखमेतोभको सहभागिताको चर्चा गरेका थिए,’ उनले भने । 

राष्ट्रपतिले अन्य नामको चर्चा गरेनन् र अखमेतोभ युक्रेनी राज्यविरुद्ध युद्धमा घिसारिएको बताए । 

अखमेतोभले राष्ट्रपतिको दाबीप्रति आक्रोशित प्रतिक्रिया दिएका छन् । त्यो बिल्कुल झूटो भएको उनले बताए । 

‘यस्तो झूटो खबर फैलाइएकोमा म आक्रोशित छु । राष्ट्रपतिले कुन उद्देश्य राखेर यसो भनेका हुन्, मलाई थाहा छैन,’ उनले बयान जारी गरेर बताए । 

‘म स्वतन्त्र युक्रेन, खुला अर्थतन्त्र, लोकतन्त्र र अभिव्यक्ति स्वतन्त्रताको प्रतिरक्षा गरिरहनेछु,’ उनले थपे । 

अखमेतोभसँग १० अर्ब डलरभन्दा बढीको सम्पत्ति रहेको बताइन्छ । उनको कम्पनी सिस्टम क्यापिटल म्यानेजमेन्टले डीटीईके नामक संस्थालाई नियन्त्रण गर्छ । उक्त संस्थाले युक्रेनको ७० प्रतिशत विद्युत् आपूर्ति गर्छ । 

उनले टेलिकम र मिडिया कम्पनीहरू पनि चलाउने गरेका छन् । 

मस्कोले कुनै पनि कूको षड्यन्त्रमा सहभागी नबनेको बताएको छ । क्रेमलिनका प्रवक्ता दिमित्री पेस्कोभले भने, ‘रुसले षड्यन्त्रमा भाग लिने कुनै योजना छैन ।’