चीन र अमेरिकाका परराष्ट्रमन्त्रीहरूबीच बिहीवार कुराकानी भएको छ । 

त्यसक्रममा चीनका परराष्ट्रमन्त्री वाङ यीले बेइजिङमा आयोजना गर्न लागिएको शीतकालीन ओलम्पिकमा हस्तक्षेप नगर्न वाशिङटनलाई चेतावनी दिए । त्यससँगै युरोपमा रुसको सुरक्षा चिन्तालाई गम्भीर रूपमा लिन पनि उनले आग्रह गरे । 

अर्को साताबाट शुरू हुने शीतकालीन ओलम्पिकबाट सफ्ट पावर विजय हासिल गर्ने लक्ष्य चीनले लिएको छ । 

अमेरिकाको नेतृत्वमा पश्चिमका कतिपय मुलुकहरूले ओलम्पिकको कूटनीतिक बहिष्कार गर्ने चेतावनी दिइरहेका छन् । 

वाङले ताइवानका विषयमा आगोसँग नखेल्न पनि वाशिङटनलाई चेतावनी दिएका छन् । 

रुसको विषयमा वाङले बताए, ‘सबै पक्षले शीतयुघकालीन मानसिकता पूरै त्यागेर सम्झौतामार्फत सन्तुलित, प्रभावकारी, दिगो सुरक्षा संयन्त्र निर्माण गर्नुपर्छ ।’

‘रुसको तर्कसंगत सुरक्षा चिन्तालाई गम्भीर रूपमा लिनुपर्छ र समाधान गर्नुपर्छ ।’

मसकोले नेटोको विस्तारका विषयमा व्यक्त गरेको चिन्तालाई विचार गर्दै वाङले सैन्य खेमाहरू बलियो बनाएर वा विस्तार गरेर क्षेत्रीय सुरक्षाको प्रत्याभूति गर्न नसकिने बताए । 

अमेरिकाको परराष्ट्र मन्त्रालयले कुराकानीका विषयमा प्रकाशित गरेको रीडआउटमा ओलम्पिकको चर्चा छैन र युक्रेनमा जोड दिइएको छ ।