साताको चौथो दिन शेयर बजार मापक सूचक नेप्से परिसूचक १९.८४ अंकले घटेको छ । 

यो साता आइतवारदेखि घट्दै गएको नेप्से सोमवार सम्हालिए पनि मंगलवार ५३ अंकले घटेको थियो । बुधबार पनि दोहोरो अंकमै घटेको छ । 

बुधवार नेप्से परिसूचक ०.७२ प्रतिशतले घटेर २७३४.४४ बिन्दुमा आइपुगेको छ । शेयर बजारमा आज २३१ कम्पनीको ५६ लाख ५२ हजार कित्ता शेयरको ३९ हजार ६६८ पटक कारोबार भएको छ । 

यसबाट जम्मा ३ अर्ब २ करोड रुपैयाँको मात्र कारोबार भयो । आज जीवन बीमा र अन्य समूहका सूचक मात्रै बढेको छ भने अन्य सबै समूहका सूचक घटेको छ । 

बजार घटेको दिन गुराँस लघुवित्त वित्तीय संस्थाका लगानीकर्ताले भने ३.४४ प्रतिशतले कमाएका छन् । ज्योति लाइफका लगानीकर्ताले पनि ३.२३ प्रतिशतले कमाएका छन । युनाइटेड इन्स्योरेन्स, सगरमाथा इन्स्योरेन्ससहितका कम्पनीको शेयर मूल्य २ प्रतिशत भन्दा बढीले बढेको छ । 

आज शेयर बजारमा कारोबार भएका कम्पनीमध्ये सबैभन्दा बढी गुमाउनेमा हाइड्रोपावर कम्पनीहरू छन् । आज बुद्धभूमि नेपाल हाइड्रोपावर कम्पनीका लगानीकताले ५.८९ प्रतिशतले गुमाएका छन् । 

मैलुङखोला जलविद्युत् कम्पनीका लगानीकर्ताले पनि ५ प्रतिशतले गुमाएका छन् । सिंगटी हाइड्रो, सीइडीबी हाइड्रो, शिवश्री हाइड्रोसहितका लगानीकर्ताले पनि ३ प्रतिशत भन्दा बढीले गुमाएका छन् ।