मोरङको लेटाङ नगरपालिका-८, ज्यामिरे टोलकी १२ वर्षीया करुणा राईको हत्याको आशंकामा प्रहरीले दुई जनालाई नियन्त्रणमा लिएको छ । 

लेटाङकै ६४ वर्षीय र ४६ वर्षीय पुरुषलाई नियन्त्रणमा लिएर अनुसन्धान थालिएको मोरङ प्रहरी प्रवक्ता डीएसपी मञ्जील मुकारुङले जानकारी दिए । 

प्रहरीले उनीहरूको नाम भने खुलाएको छैन । पक्राउ परेकाहरूको घर बालिकाको घर आउने बाटोमा रहेको मोरङ प्रहरीको भनाइ छ । 

बुधवारदेखि हराएकी ती बालिकाको शव खाल्डोभित्र वस्त्रविहीन अवस्थामा शुक्रवार भेटिएको थियो । 

विद्यालयबाट घर फर्किने क्रममा बुधवार दिउँसोदेखि बालिका बेपत्ता भएकी थिइन् । 

शव पोस्टमार्टमका लागि बीपी कोइराला स्वास्थ्य विज्ञान प्रतिष्ठान धरान पठाइएको मोरङ प्रहरीले जनाएको छ । 

बालिकाको बलात्कारपछि हत्या भएको हो कि भन्ने आशंका प्रहरीले गरेको छ । पोष्टमार्टम रिपोर्ट आएपछि मात्रै थप भन्न सकिने मुकारुङले बताए ।

जाँते माध्यमिक विद्यालयको कक्षा ६ मा अध्ययनरत बालिका विद्यालयबाट घर फर्किने क्रममा बुधवार दिउँसो ४ बजेदेखि बेपत्ता भएकी थिइन् । 

बालिका बेपत्ता भएपछि खोजतलासका लागि परिवारका सदस्यले प्रहरीलाई सूचना दिएका थिए । 

घटनास्थल बालिकाको घरबाट लगभग ३ किलोमिटर जति दक्षिण र उनी अध्ययनरत विद्यालयबाट लगभग २ किलोमिटर पश्चिममा पर्छ । 

प्रहरीले खाल्डोबाट बालिकाको शव उत्खनन गरेर बाहिर निकाल्दा घटनास्थल तनावपूर्ण बनेको थियो । 

ठूलो संख्यामा भेला भएका विद्यार्थी र स्थानीयले आक्रोशित हुँदै प्रहरीविरुद्ध  नाराबाजी गरेका थिए ।