हिमालयन बैंक लिमिटेडले आफ्नो मोबाइल बैकिङमा एकीकृत नेपालपे क्यूआरको सफल रुपमा अन्तरआबद्धता कायम गरेको छ । 

अब बैंकका ग्राहकहरूले मोबाइल बैंकिङमार्फत् विभिन्न मर्चेन्ट तथा पेमेन्ट गेटवेहरूमा रहेको नेपालपे क्यूआर स्क्यान गरेर सजिलै भुक्तानी गर्न सक्नेछन् । 

साथै बैंकले राष्ट्र बैंकले जारी गरेको नेपालपे क्यूआरमा आधारित भएर आफ्नो मर्चेन्ट म्यानेजमेन्ट सिस्टमको प्रयोग गरेर नेपालपे, भिसा, युनियन पे र अलिपेलगायतका लागि अन्तरसञ्चालनशीलता तथा अन्तरआबद्धता कायम हुने गरी एग्रिगेटेड क्यूआर पनि स्वीकार गर्ने कार्यको थालनी गरेको छ ।  

‘नेपाल राष्ट्र बैंकले प्रकाशित गरेको नेपाल–क्युआर स्ट्याण्डर्डको मूल पूर्वाधारको रुपमा नेपालपे क्यूआर स्थापना र ल्ऋज्ी द्वारा सञ्चालित हो, जस अन्तर्गत सदस्य बैंक वित्तीय संस्थाहरु, भुक्तानी सेवा प्रदायकहरु र अन्य भुक्तानी प्रणाली सञ्चालकहरुले छुट्टै योजनाकोे रुपमा र मर्चेन्ट वा अन्य क्यूआर स्कीमसँग अन्तरआबद्धता कायम गरी प्रयोग गर्न सकिने व्यवस्था रहेको छ,’ विज्ञप्तिमा भनिएको छ । 

वाणिज्य बैंक मध्ये नेशनल पेमेन्ट स्वीचमा जोडी नेपालपे क्यूआरलाई एग्रिगेटेड क्यूआरको रुपमा लागू गर्ने हिमालयन बैंक पहिलो हो । 

बैंकका व्यापारिक ग्राहकहरू मर्चेन्टको रुपमा आबद्ध भएर आफ्ना ग्राहकहरुबाट हिमालय बैंकको मोबाइल बैंकिङ वा नेपालपे क्युआरमा आबद्ध अन्य उपकरणहरु मार्फत् सीधै आफ्नो खातामा भुक्तानी प्राप्त गर्न सक्दछन् । 

यसरी हिमालयन बैंकको मोबाइल बैंकिङमा क्यूआर जोड्दा र एग्रिगेटेड क्यूआरमा मर्चेन्ट अक्वायर गर्दा रिटेल स्तरमा हुने विद्युतीय भुक्तानीमा थप वृद्धि हुने आशा गरिएको छ, जुन यस बैंकको प्राथमिकता पनि रहेको छ । 

हिमालयन बैंकले भिसा, मास्टरकार्ड, अमेक्स, युनियन पे, एससीटीका कार्डहरू जारी गर्नुका साथै भिसा, मास्टरकार्ड अमेरिकन एक्सप्रेस, युनियनपे, जेसीबी, एससीटी कार्डका कारोबार स्वीकार पनि गर्दै आएको छ । यस बैंकको नेपालभर १५२ वटा एटीएम र ५ हजारभन्दा बढी पीओसहरू उपलब्ध छन् ।