महामारीपछि भएको अत्यधिक मूल्यवृद्धिमा सरकारी बेवास्ता, उपभोक्ता मारमा- अधिकारकर्मी

कोरोना महामारीपछि मूल्यवृद्धि अधिक हुँदा पनि सरकारी बेवास्ताले उपभोक्ता मारमा परेको अधिकारकर्मीले बताएका छन् । 

विश्व उपभोक्ता दिवसको अवसरमा मंगलवार राजधानीमा आयोजित कार्यक्रममा उपभोक्ता अधिकारकर्मीहरूले महामारीपछि महँगीको मारमा पर्दा पनि सरकार रमिते भएर बसेको बताएका हुन् ।

कन्जुमर राइट नेपालका अध्यक्ष विमला खनालले महामारीपछि दूध, पेट्रोलियम पदार्थ, तेल, सिमेन्टमा  मूल्यवृद्धि भएको तर सरकार चुप लागेर बसेको आरोप लगाइन् । 

‘सरकारले उपभोक्ता अधिकारको विषयमा कुनै वास्ता नगर्ने र उपभोक्तालाई महँगीमा पारिरहने गरेको छ,’ उनले भनिन् । 

उपभोक्ता अधिकार हनन भए पनि नियामक निकाय चुप लागेर बसेको अधिकारकर्मीहरूको भनाइ छ । 

नेपाल उपभोक्ता तथा महिला बालबालिका अधिकार मञ्चकी अध्यक्ष अप्सरा कोइरालाले राज्यले उपभोक्ताबाट कर मात्रै असुल गर्ने तर सेवा सुविधा नदिने गरेको बताइन् । 

‘विदेशमा उपभोक्ता सर्वोपरि हुन्छ तर हाम्रोमा उपभोक्तालाई बेवास्ता गर्ने गरिएको छ,’ उनले प्रश्न गरिन्, ‘सरकारले मूल्यवृद्धि कसको लागि गरेको जनताको लागि हो कि राजनीति दल चलाउन ?’ 

सरकारले जबसम्म नेपाली उपभोक्तालाई चिन्दैन तबसम्म उपभोक्ताले अधिकार नपाउने अवस्था रहेको कोइरालाले बताइन् ।

उपभोक्ता अधिकार अनुसन्धान मञ्चका अध्यक्ष माधव तिम्सिनाले उपभोक्ता पाइला–पाइलामा ठगिइरहेको बताए । उपभोक्ताको हकमा आवाज उठाउने उपभोक्ता परिषद् रहने भए पनि परिषद् अध्यक्ष हुने उद्योग वाणिज्य मन्त्रालय नै ८–९ महिनादेखि नियुक्त हुन नसक्नु विडम्बना भएको तिम्सिनाले बताए । उनले उपभोक्ता अधिकारका लागि सरकार जिम्मेवार नभएको र यसका लागि तीनै तहबाट समीक्षा गर्नुपर्ने पनि बताए । 

देशमा तीन तहको सरकार भए पनि आपसी समन्वय नभएको, उपभोग्य वस्तु र उपभोक्ताले पाउने सूचीको कसैले पनि रेकर्ड नराख्ने गरेको पनि तिम्सिनाले बताए । 

सरकारले नियमित अनुमगन गर्ने र उपभोक्ताको अधिकारलाई उच्च महत्त्व दिँदै जानुपर्ने उनको भनाइ छ ।