सरकारले संसद् अधिवेशन अन्त्य गर्न सिफारिस गरेको छ । 

मंगलवार बसेको मन्त्रिपरिषद् बैठकले आजै राति १२ बजेदेखि अधिवेशन अन्त्य गर्न राष्ट्रपति विद्यादेवी भण्डारीसमक्ष सिफारिस गर्ने निर्णय गरेको हो ।

मन्त्रिपरिषद्को बैठकले संसद् अधिवेशन अन्त्यको सिफारिस गरेको बैठकमा सहभागी एक मन्त्रीले जानकारी दिए ।

बुधवार बस्ने भनिएको संसद् बैठकमा प्रधानन्यायाधीश चोलेन्द्रशमशेर जबराविरुद्धको महाभियोग प्रस्तावमाथि छलफल गर्ने कार्यसूची तय भएको थियो । तर, सरकारले महाभियोग टुंगो नलगाइ संसद् अधिवेशन अन्त्य गर्ने निर्णय गरेको हो । 

संसदको यसै अधिवेशनमा प्रतिनिधि सभामा प्रधानन्यायाधीश जबराविरुद्धको महाभियोग प्रस्ताव दर्ता भएको थियो । 

संसद् अधिवेशनको अन्त्य र शुरूआत सरकारको सिफारिसमा राष्ट्रपतिले गर्ने व्यवस्था छ । 

संसदको यसै अधिवेशनले अमेरिकी सहयोग परियोजना मिलेनियम च्यालेन्ज कर्पोरेसन (एमसीसी)सँगको सम्झौता अनुमोदन गरेको थियो । 

संसदको प्रमुख प्रतिपक्ष दल एमालेले निरन्तर अवरोध गरेका कारण यो अधिवेशन पनि प्रभावकारीरुपमा सञ्चालन हुन सकेको थिएन ।