वडा प्रहरी प्रहरी कार्यालय बुटवलको हिरासतमा रहेका एक पुरुष घाँटी रेटिएको अवस्थामा फेला परेका छन् । चोरी आरोपमा पक्राउ परेका बुटवल-११ रूपन्देहीका २८ वर्षीय रूद्रबहादुर नेपाली घाँटी रेटिएको अवस्थामा फेला परेका हुन् । 

आइतवार बिहान हिरासतमा घाँटीको रेटिएको अवस्थामा भेटिएका उनलाई तत्काल उद्धार गरेर लुम्बिनी प्रादेशिक अस्पताल लगिएको थियो । अहिले उनको उपचार भइरहेको छ । 

नेपालीकी दिदी मनकुमारी सार्कीले घाँटी रेटिएको अवस्था भेटिएपछि प्रादेशिक अस्पतालको भेन्टिलेटरमा उपचार भइरहेको बताइन् । उनका अनुसार नेपालीको अवस्था गम्भीर छ । 

प्रादेशिक अस्पतालमा सरसफाइको काम गर्ने नेपालीलाई तामाका तारहरू चोरी गरेको आरोप लागेपछि प्रहरीले पक्राउ गरेको थियो । उनीसँग तामाका तारहरूसमेत भेटिएपछि सोधपुछका लागि प्रहरीले हिरासतमा राखेको थियो । 

इलाका प्रहरी कार्यालय बुटवल प्रमुख डीएसपी ठगबहादुर केसीले हिरासतमै उनले आत्महत्याको प्रयास गरेर घाँटीमा चोट लागेको बताए । 

‘उनले सुसाइड गर्न खोजेको जस्तो देखियो, नियन्त्रणमा लिएको केही समयमै उनी शौचालय गएर आएपछि रगत देखियो,’ उनले भने, ‘हेर्दा घाँटीमा चोट लागेको देखिएपछि तुरुन्तै अस्पताल पुर्‍याइएको हो । उनको उपचार भइरहेको छ ।’ 

तर, नेपालीकी दिदी मनकुमारीले घटना सुनियोजित देखिएको भन्दै छानबिन गर्न आग्रह गरिन् ।

‘लडेको भए पेट, छाती वा अन्यत्र चोट लाग्नु पर्ने, त्यस्तो केही छैन, घाँटी मात्र रेटिएको छ । यो घटना शंकास्पद देखिएको छ,’ उनले भनिन् ।