‘स्थानीय तह निर्वाचन सम्बन्धमा’ शनिवार सुरक्षा गोष्ठी सम्पन्न भएको छ । भर्चुअल माध्यमबाट सबै जिल्ला सुरक्षा समितिका पदाधिकारी सबै प्रदेशका तिनै सुरक्षा निकायका प्रमुखहरू सहभागी थिए । 

गोष्ठीमा निर्वाचन सुरक्षा सम्बन्धमा देखा परेका चुनौति र ती चुनौतीको समाधान कसरी गरेर निर्वाचनलाई स्वच्छ, निष्पक्ष र धाँधलीरहित तरिकाले सम्पन्न गर्ने भन्ने विषयमा छलफल भएको गृह मन्त्रालयका प्रवक्ता सहसचिव फणिन्द्रमणि पोखरेलले जानकारी दिए । 

गोष्ठीमा प्रदेशगत रूपमा एउटा प्रदेशबाट एक जिल्लाका प्रमुख जिल्ला अधिकारीले प्रस्तुति व्यक्त गरेका थिए । 

प्रदेशगत प्रस्तुति सुनेपछि तीनै सुरक्षा निकायका प्रमुखहरू, गृहसचिव पाण्डे र गृहमन्त्री खाणले निर्वाचन स्वच्छ, निष्पक्ष र धाँधलीरहित तरिकाले उपलब्ध स्रोत र साधनको उपयोग गरेर सम्पन्न गर्न निर्देशन दिएका थिए । 

गोष्ठीमा केन्द्र, प्रदेश र जिल्लाका सुरक्षा समितिका पदाधिकारी र सदस्यलाई निर्देशन दिँदै गृहमन्त्री खाणले निर्वाचन स्वच्छ निष्पक्ष र धाँधलीरहित रूपमा सम्पन्न गर्न सुरक्षा व्यवस्थामा कुनै कसर बाँकी नराख्न निर्देशन दिए । 

त्यस्तै स्थानीय तह निर्वाचनका लागि भर्ना भएका म्यादी प्रहरीलाई आगामी दिनमा सुरक्षा निकायमा भर्ना हुँदा प्राथमिकतामा राख्न सुरक्षा निकायका प्रमुखहरूलाई निर्देशन दिए । 

‘निर्वाचनका लागि सरकारले एक लाख म्यादी प्रहरी भर्ना गरेको छ । उनीहरू निर्वाचनमा सुरक्षा दिँदा नयाँ भन्दा अनुभव प्राप्त हुन्छन्,’ गृहमन्त्री खाणले भने,  ‘आगामी दिनमा सुरक्षा निकायले नयाँ भर्ना लिँदा मापदण्ड अनुरुप भएका भएमा उनीहरूलाई प्राथमिकतामा राख्नुहोला ।’

 त्यस्तै गृहमन्त्री खाणले निर्वाचन सम्पन्न हुने बेलासम्म देखिने सबै प्रकारका चुनौती उपलब्ध स्रोत र साधन उपयोग गरेर सामना गर्न तयारी अवस्थामा रहन समेत निर्देशन दिए । 

उनले सीमित स्रोत साधन उपयोग गरेर अहिलेसम्म जिल्ला जिल्लामा भएको निर्वाचनको सुरक्षा सम्बन्धमा भएको तयारी प्रशंसायोग्य रहेको पनि बताए । 

गृहसचिव पाण्डेले निर्वाचनको सुरक्षा र निष्पक्षता सरकारको मुख्य ध्येय भएकाले त्यसै अनुरुप काम गर्न निर्देशन दिए ।