११ साउन २०८३, सोमबार
रुकुमपश्चिममा नेपाली कांग्रेसले माओवादी केन्द्रका कार्यकर्तामाथि आक्रमण गरेको छ ।
मुसिकोट नगरपालिका–१ का माओवादी कार्यकर्ताहरूलाई भोट हाल्न जाने क्रममा कांग्रेसका कार्यकर्ताले आक्रमण गरेका हुन् ।
आक्रमणमा परी माओवादी कार्यकर्ताहरू करण बोहरा (३२), गणेश बोहरा (२३), राजकुमार रावल (२५), उदिराम बोहरा (१९), विनाराम बोहरा (४८), ओपिराम बोहरा (१९) र छविलाल बोहरा (२५) घाइते भएका छन् ।
अधिकांशको अवस्था गम्भीर छ । रुकुममा उपचार हुन नसकेपछि केही घाइतेहरूलाई नेपालगञ्ज लगिँदैछ ।
घाइतेहरूको उपचार र रेखदेखमा अर्थमन्त्री एवं माओवादी नेता जनार्दन शर्मा खटिएका छन् ।
आफ्ना कार्यकर्तामाथि आक्रमण भएपछि उनी दिनभर नै कार्यकर्ताको सुरक्षा र घाइतेहरूको उद्धारमा खटिएका थिए ।
यसअघि बाँफीकोट गाउँपालिका अध्यक्षका कांग्रेस उम्मेदवार जनककुमार बाँठा मगर चढेको गाडीले ठक्कर दिँदा ७ नम्बर वडाका ७० वर्षीय प्रवीण खत्रीको मृत्यु भएको थियो । मतदान केन्द्रको स्थलगत निरीक्षणका लागि जाँदै गरेका बाँठा चढेको गाडीले ठक्कर दिँदा मतदानका लागि जाँदै गरेका खत्रीको मृत्यु भएको हो ।
नेकपा माओवादी केन्द्र रुकुमले कांग्रेसका गाउँपालिका अध्यक्षका उम्मेदवारले नै गाडी चलाएर आफ्ना कार्यकर्ताको हत्या गरेको आरोप लगाएको छ ।
निर्वाचनको दिन शुक्रवार भएका घटनाहरू नियोजित भएको माओवादीको दाबी छ ।
माओवादी केन्द्रले घटनाको विरोध जनाउँदै सरकारी सुरक्षा संयन्त्रको आड र मौन समर्थनमा आफ्ना कार्यकर्ताहरूमाथि आक्रमण गरेको आरोप लगाएको छ ।
