जम्मु कश्मीरको परिसीमनका विषयमा पाकिस्तानले एक संकल्प प्रस्ताव पारित गरेपछि भारतले त्यो हास्यास्पद भएको बताएको छ । 

जम्मु कश्मीर र लद्दाख भारतको अखण्ड भूभाग भएको बताउँदै भारतले आफ्नो आन्तरिक मामिलामा हस्तक्षेप गर्ने अधिकार पाकिस्तानसँग नभएको स्पष्ट पारेको छ ।

भारतको विदेश मन्त्रालयका प्रवक्ता अरिन्दम बागचीले भने, ‘जम्मु कश्मीर केन्द्रशासित प्रदेशको परिसीमन अभ्यास लोकतान्त्रिक अभ्यासको सिद्धान्तअन्तर्गत रही भारतले गरेको छ ।’

सन् २०१९ मा जम्मु कश्मीरको विशेषाधिकार खोसेर त्यसलाई केन्द्रशासित प्रदेश बनाएपछि भारतले त्यहाँ परिसीमनको काम गरेको छ । त्यो विवादित भूमि भएकाले पाकिस्तानको सहमतिबेगर भारतले त्यसरी परिसीमन गर्न नपाउने पाकिस्तानको अडान छ ।

पाकिस्तानले भारतविरोधी प्रचारबाजी गरिरहनु भन्दा पनि आफ्नो शासन व्यवस्था चुस्तदुरुस्त गर्नुपर्ने बागचीको भनाइ छ । 

पाकिस्तानले गत साता जम्मु कश्मीर परिसीमनको प्रस्ताव पारित गरेको थियो ।