विराटनगर ।  ४० वर्षदेखि पाल्दै आएको ‘टुपी’ काटिदिएको भन्दै मोरङका एक ब्राम्हणले  प्रहरीमा उजुरी दिएका छन् । 

टुपी काट्नेलाई कारबाहीको माग राख्दै उनले उजुरी दिएका हुन् । 

मोरङ  विराटनर १२ मा बस्दै आएका ५२ वर्षीय मनोज शर्माको कम्मरसम्मको एक फिट लामो ‘टुप्पी’ काटिदिनेलाई कारवाहीको माग राख्दै मोरङ प्रहरीमा उजुरी दिएका हुन् ।

शर्माको टुप्पी कटहरी गाउँपालिका ४ का फिरोज मियाँले काटिदिएका हुन् । 

मियाँले १३ वैशाखमा राति साढे ७ बजे कटहरी ४ मा टुपीमा तानेर कैँचीले जबरजस्ती काटिदिएको शर्माको भनाइ छ ।

आफ्नो बारीको पानी तान्ने पम्प चोरी गर्ने फिरोज मियाँले टुप्पी काटिदिएको शर्माको आरोप छ ।

कटहरी ४ मा खेतीयोग्य जग्गा रहेका शर्माले खेतमा पानी तान्ने मोटर चोरेको अवस्थामा रंगेहात फिरोजलाई भेटेको बताएका छन् । 

चोरीबारे प्रहरीमा आफूले उजुरी दिएपछि उजुरी फिर्ता लिन दबाब दिएको र नमान्दा कटहरीस्थित घरमा बसेको बेला टुप्पीमा तानेर सडकमा ल्याई काटिदिएको उनको भनाइ छ ।

जिल्ला प्रहरी कार्यालय मोरङका प्रमुख एसपी शान्तिराज कोइरालले टुप्पी काटेको घटनाको विषयमा अनुसन्धान भइरहेको बताए । 

‘हामीले उजुरी लिएर घटनाको अनुसन्धान गरिरहेका छौं,’ उनले भने, ‘अहिले यस विषयमा हामीले अनुसन्धान गरिरहेका छौं ।’