सोमवार राति ८ बजे काठमाडौं उपत्यका अपराध अनुसन्धान कार्यालयमा एउटा सूचना आयो- क्यासिनोमा नेपाली प्रवेश गराइएको छ । 

लगत्तै कार्यालयले उपत्यकामा क्यासिनो कति छन् भनेर पत्ता लगायो । त्यसपछि प्रहरी प्रधान कार्यालयसँग समन्वय गरेर उपत्यकामा रहेका ८ वटै क्यासिनोमा छापा हान्ने योजना बन्यो । 

राति ८ बजिसकेकाले घर गइसकेका प्रहरी कर्मचारीहरूलाई पनि तत्कालै बोलाइयो । र, उपत्यकामा भएका क्यासिनोमा नेपाली खेले/नखेलेको पत्ता लगाउन खटाइयो । 

अपरेसनका लागि खटिए वरिष्ठ प्रहरी उपरीक्षक (एसएसपी) वसन्त कुँवर, प्रहरी उपरीक्षक (एसपी) कृष्ण कोइरालालगायतका प्रहरी कर्मचारी । 

काठमाडौं उपत्यकाका ८ वटै क्यासिनोमा प्रहरी पुग्यो । त्यसमध्ये २ वटा र्‍याडिसन र सांग्रिलामा रहेका क्यासिनो बन्द थिए । 

अन्य ६ वटा क्यासिनोमा पुग्दा ३ वटामा नेपाली भेटिएनन् । रातिको साढे १० नबज्दै अन्य ३ वटा क्यासिनोबाट भने प्रहरीले १२ जनालाई नियन्त्रणमा लियो । 

नियन्त्रणमा लिएका १२ जनामध्ये ४ जना अन्य देशका नागरिक विना कागजका भेटिए । उनीहरूले केही छिनमा कागजपत्र देखाएपछि प्रहरीले उनीहरूलाई छाड्यो । अन्नपूर्ण, सोल्टी र मल्ल होटलमा रहेको क्यासिनोका गरी ३ जना म्यानेजर र अन्य ५ जना नेपालीलाई भने प्रहरीले पक्राउ गरेको छ । 

‘सरकारले क्यासिनोमा नेपालीहरूलाई रोक लगाएपछि केहीले छिराएर खेलाइरहेका छन् भन्ने सूचना पाएलगत्तै हामीले एक्सन लिएर उनीहरूलाई नियन्त्रण लिएका हौँ,’ अपराध अनुसन्धान कार्यालय प्रमुख एसएसपी कुँवरले लोकान्तरसँग भने, ‘हामीले क्वीक टोली परिचालन गर्‍यौँ ।’ 

सरकारले नेपाली क्यासिनोमा नेपालीलाई खेल्न रोक लगाएको छ । पछिल्लो समय क्यासिनोका म्यानेजरहरूको मिलोमतोमा नेपालीहरूलाई जुवा खेलाउने गरेको भन्दै आलोचना भइरहेको थियो । 

यस्तै सोमवार राति नै नेपालगञ्जका सात क्यासिनोमा पनि प्रहरीले छापा मारेको छ । 

नेपालगञ्जस्थित धम्बोझी चोक नजिक रहेको होटल सिटी प्यालेसभित्र सञ्चालनमा रहेको सीटीई गेमिङ क्लब क्यासिनोबाट प्रहरीले ६ जना नेपालीलाई पक्राउ गरेको छ । 

यसअघि पनि आइतवार सोही क्यासिनोबाट नेपालगञ्जका सात नेपाली युवालाई प्रहरीले नियन्त्रणमा लिएको थियो । 

नेपालको कुनै पनि क्यासिनोमा विदेशीबाहेक नेपालीलाई प्रवेश गर्न निषेध छ ।