एक ट्राफिक प्रहरीले फुटपाथमा हिँडिरहेका डाक्टरलाई कुटपिट गरेका छन् । 

आरोग्य स्वास्थ्य प्रतिष्ठानमा कार्यरत ३१ वर्षीय डा. कुलबहादुर घिसिङलाई ट्राफिक प्रहरी जवान राजेन्द्र थापाले ललितपुरको एकान्तकुना यातायात जाने बाटोमा कुटपिट गरेका हुन् । 

कुटपिटबाट घाइते डा. घिसिङ अहिले अल्का अस्पतालमा उपचाररत् छन् । 

असार १२ गते राति पौनै ९ बजे ड्युटी सकेर फुटपाथबाट हिँड्दै घर जान लागेका बेला आफूमाथि घाइते हुने गरी कुटपिट भएको डा. घिसिङले बताए । आफूले चिकित्सकको परिचयपत्र देखाउँदा पनि रक्ताम्मे हुने गरी कुटपिट गरेको उनको भनाइ छ । 

उनी र उनका आफन्तले घटनामा संलग्न ट्राफिक प्रहरी जवानलाई कारबाहीको माग गरेका छन् । साथै उपचार खर्च दिलाउन पनि माग गरिएको छ ।