नेपाल राष्ट्र बैंकले देशको वर्तमान आर्थिक तथा वित्तीय स्थिति सार्वजनिक गरेको छ । राष्ट्र बैंकले आर्थिक वर्ष २०७८–०७९ को ११ महिनाको तथ्यांकमा आधारित भएर ताजा स्थिति सार्वजनिक गरेको हो । 
जसमा वार्षिक बिन्दुगत आधारमा उपभोक्ता मूल्य सूचकाङ्कमा आधारित मुद्रास्फीति ८.५६ प्रतिशत रहेको बैंकले जनाएको छ । 

यस्तै आयात २७.५ प्रतिशतले, निर्यात ५३.३ प्रतिशतले र कुल वस्तु व्यापार घाटा २५ प्रतिशतले बढेको छ । विप्रेषण आप्रवाह नेपाली रुपैयाँमा ३.८ प्रतिशतले बढेको छ भने अमेरिकी डलरमा १.५ प्रतिशतले बढेको छ ।
यस्तै शोधनान्तर स्थिति रु.२६९ अर्ब ८१ करोडले घाटामा रहेको छ । कुल विदेशी विनिमय सञ्चिति भने ९ अर्ब ४५ करोड अमेरिकी डलर रहेको तथ्यांकमा उल्लेख छ । 

संघीय सरकारको खर्च रु.१०३५ अर्ब ६१ करोड र राजस्व परिचालन रु.९४२ अर्ब १३ करोड रहेको पनि राष्ट्र बैंकले जनाएको छ । यस्तै विस्तृत मुद्राप्रदाय ३.९ प्रतिशतले बढेको छ भने वार्षिक बिन्दुगत आधारमा यस्तो मुद्राप्रदाय ९.० प्रतिशतले बढेको छ ।
बैंक तथा वित्तीय संस्थाको निक्षेप संकलन ५.७ प्रतिशतले बढेको छ भने निजी क्षेत्रमा प्रवाहित कर्जा १३.५ प्रतिशतले बढेको छ । यस्तै वार्षिक बिन्दुगत आधारमा निक्षेपको वृद्धिदर ११.३ प्रतिशत र निजी क्षेत्रमा प्रवाहित कर्जाको वृद्धिदर १५.७ प्रतिशत रहेको पनि राष्ट्र बैंकले जनाएको छ ।