एक राजनीतिक कार्यक्रममा गोली हानी हत्या गरिएका जापानका पूर्वप्रधानमन्त्री शिन्जो आबेको मंगलवार अन्तिम संस्कार गरिँदै छ । उनको बौद्ध परम्पराअनुसार अन्तिम संस्कार गरिन लागेका जापानी सञ्चारमाध्यमहरूले जनाएका छन् । 

सोमवार आबे परिवारले प्रार्थनासभाको आयोजना गरेका थिए । परिवारले आयोजना गरेको प्रार्थनासभामा मृतक शिन्जो आबेका आफन्त तथा निकट व्यक्तिहरु सहभागी भएका थिए । उक्त सभामा प्रधानमन्त्री फुमिया किशिदा पनि सहभागी भएको सिएनएनले जनाएको छ । 

गत शुक्रबार एक चुनावी प्रचार कार्यक्रमलाई सम्बोधन गरिरहेका बेला उनीमाथि गोली प्रहार गरिएको थियो । गोली प्रहार गरिएलगत्तै अस्पताल पुर्‍याइएका आबेको उपचारका क्रममा निधन भएको थियो ।