मिटरब्याजीविरुद्ध परेको उजुरीको छानबिन गर्न जिल्ला प्रशासन कार्यालय पश्चिम नवलपरासीले कार्यदल गठन गरेको छ । सहायक प्रमुख जिल्ला अधिकारीको संयोजकत्वमा ५ सदस्यीय ‘मिटरब्याजी समस्या समाधानार्थ कार्यदल’ गठन गरिएको हो । यो कार्यदलले जिल्लामा देखिएको मिटरब्याजी समस्या समाधान गर्न पहल गर्ने छ ।

कार्यदल सदस्यमा जिल्ला प्रहरी कार्यालयका डीएसपी भोजराज पाण्डे, प्रहरी निरीक्षक केशव ज्ञवाली, जिल्ला प्रशासन कार्यालयका नायब सुब्बा राजकुमार यादव र प्रहरी हवल्दार नारायण कार्की रहेका छन् । ‘पहिला कार्यदलले उजुरी उपर छानबिन गर्छ । छानबिनका आधारमा पक्राउ गर्नुपर्ने व्यक्तिलाई पक्राउ गर्ने र छलफलबाट टुंगिने विषयलाई छलफलबाट टुंग्याइन्छ’, कार्यदल सदस्य डिएसपी पाण्डेले भने । 

अधिकांश ऋणीहरूले दर्ता गराएका उजुरीमा प्रमाण बलियो देखिएको छैन । प्रमाण बलियो नभएकाले कानूनी प्रकृया अघि बढाउन पनि कार्यदललाई कठीन छ । सोमवारसम्म जिल्लामा १ सय २२ वटा उजुरी दर्ता भएका छन् । यसअघि जिल्लामा परेका २५ वटा उजुरीमध्ये २० वटा समाधान भएको र ५ वटा मिल्न नसकेकाले कानूनी प्रकृयामा पठाइएको प्रशासनले जनाएको छ ।