निलम्बित प्रधानन्यायाधीश चोलेन्द्रशमशेर जबराले महाअभियोग सिफारिस समितिको बैठकमा बुधवार उपस्थिति भएर बयान दिएका छन् ।

बयानको पहिलो दिनमा ४ प्रश्नमा मात्र छलफल भएको छ भने बिहीवार बिहान ११ बजे पुनः बयान हुने तय भएको छ । 

बुधवारको बयानपछि सांसद लालबाबु पण्डितले बयानको प्रारम्भ भएको र राणामाथि लागेको आरोपका विषयबाट बयान प्रारम्भ गरिएको जानकारी दिए । ‘उहाँमाथि लागेका आरोपका विषयबाट बयान शुरूआत भयो,’ उनले भने, ‘प्रश्न, प्रतिप्रश्न आज ४ घण्टाजति छलफल भयो, खासगरी न्यायापालिकामा हुने भ्रष्टाचार, समयमा न्याय निरुपण नभएको, बिचौलियाको प्रयोग भएको जस्ता विषयमा प्रश्न गरिएको थियो ।’

निलम्बित प्रधानन्यायाधीश राणाका लागि बयान लिन समितिले ४३ वटा प्रश्न तयार तयार गरेको छ । बुधवार ४ वटा प्रश्नमाथि मात्र छलफल भएको छ । बयानपछि समितिमा सांसद मीन विश्वकर्माले पनि बयान प्रारम्भ भएको र त्यसको निष्कर्ष आउन समय लाग्ने जानकारी दिँदै निलम्बित प्रधानन्यायाधीश जबराले आफू दोषी नभएको तर सबैले आफूमाथि एक पक्षीयरूपमा आरोप लगाएको बयान दिएका बताए ।

६ महिनाभन्दा बढीदेखि निलम्बनको अवस्थामा रहेका राणाको महाअभियोग प्रमाणित हुने वा नहुने विषयले ३ महिनामै निष्कर्ष आउनुपर्ने भए पनि लामो समयपछि समितिमा छलफल प्रारम्भ भएको छ । समितिको भदौ ८ गते बसेको बैठकले उनलाई बयानका लागि बोलाउने निर्णय गरेको थियो । 

निर्णयअनुसार राणा बुधवार बयानका लागि समितिमा उपस्थित भएका हुन् । राणाविरुद्ध गत फागुन १ गते प्रतिनिधि सभाका ९८ सांसदले महाभियोग प्रस्ताव दर्ता गरेका थिए । संसद्ले महाभियोग सिफारिस समिति गठन गरे पनि यहीँ भदौ १ गते पहिलो बैठक बसेको थियोे ।

राणाविरूद्ध नेपाल बार एसोसिएसन र सर्वोच्च बार एशोसिएशनले महाअभियोग पुष्टि गर्न ३४ बँुदे पत्र समितिलाई बुझाएको थियोे । पत्रमा महाअभियोग लगाउने आधार र कारण समेत समेटिएको छ । समितिले निलम्बनमा परेका प्रधानन्यायाधीशलाई प्रश्न सोध्ने र राणाले प्रश्नको जवाफ दिनेक्रम बिहीवार पनि हुनेछ ।

बुधवारको बैठकमा निलम्बित प्रधानन्यायाधीश राणा १०ः४५ बजे नै ११ बजेको बयानका लागि सिंहदरबार पुगेका तर बैठक कसरी अघि बढाउने भन्ने विषयमा समितिमा छलफल गर्दा करीब १ घण्टा ढिला बयान प्रारम्भ भएको थियो ।