नेकपा एमालेका स्थायी कमिटी सदस्य एवं पूर्वमन्त्री शेरबहादुर तामाङले सिन्धुपाल्चोकमा निर्वाचन क्षेत्र रणनीतिक सडकको शिलान्यास गरेका छन् ।

शनिवार मेलम्ची नगरपालिकाको भदौरेमा आयोजित कार्यक्रममा तामाङले सिन्धुपाल्चोक जिल्ला निर्वाचन क्षेत्र नं २ को रणनीतिक सडकको शिलान्यास गरेका हुन् ।

उक्त सडकको निर्माण सम्पन्न भएपछि स्थानीय कृषकले उत्पादन गरेको वस्तुले बजार पाउने तामाङले बताए । 

निर्वाचन क्षेत्र रणनैतिक सडक भदौरे–सिन्धुधुसिनी–कटुन्जे–मेलम्ची–नवलपुर–चौतारा–नौबिसेलाई समेटेर निर्माण सम्पन्न हुने छ । अहिले शिलान्यास भएको कालोपत्रे सडक हो । यो सडक तीन खण्डमा निर्माण गर्ने तयारी छ । 

अहिले भने पहिलो खण्डअन्तर्गत १२ किलोमिटर कालोपत्र सडक बन्न लागेको छ । तीन खण्डमा बन्ने सडकको २ अर्ब लागतमा डीपीआर गरिएको थियो । पहिलो खण्डको १२ किलोमिटर सडक भने २० करोड लगानीमा बनाउन लागिएको छ । 

सो सडकले मेलम्ची नगरपालिकाका वडा नं ५, १० र ११ वडा, इन्द्रावती गाउँपालिका हुँदै चौतारा साँगाचोकगढी नगरपालिकाको नौबिसेसम्म छुनेछ ।

कमलजीत गणेश एण्ड गंगा आरए जेभी निर्माण कम्पनीले उक्त सडक निर्माणको जिम्मा पाएको छ । उक्त सडकमा असफाल्ट र डीबीएम प्रविधिको कालोपत्रे हुनेछ । 

सडक शिलान्यास कार्यक्रममा मेलम्ची नगरपालिकाका पूर्वप्रमुख डम्बर अर्याल, उपप्रमुख उमा प्रधान, विभिन्न राजनीतिक दलका प्रतिनिधिहरूको उपस्थिति रहेको थियो ।