राजधानीको कागेश्वरी मनहरा नगरपालिका–८ गोठाटारमा सोमबार बेलुका लाल मोहम्मद दर्जीलाई लखेटी लखेटी गोली प्रहार गरेको पाइएको छ । घटनास्थलमा रहेको सीसीटीभी क्यामेरामा कैद भएको भिडियोमा हतियारधारी रातो कपडा लगाएका व्यक्तिले उनलाई गाडीबाट ओर्लदै गर्दा गोली हानेको देख्न सकिन्छ । 

सेतो गाडीमा सवार मोहम्मद गाडीबाट ओर्लनै बित्तिकै हतियारधारीले गोली हानेको पाइएको हो । उनी गाडीको पछाडि लुक्न खोज्दा हतियारधारीले लखेटेको देख्न सकिन्छ । घटनालगत्तै स्थानीय अन्य व्यक्तिहरु आएपछि हतियारधारी व्यक्ति भागेको  सीसीटीभी फुटेजमा देखिन्छ । 

पल्सर मोटरसाइकलमा आएर ४ राउण्ड गोली हानेर अपराधी फरार भएको प्रहरीले जनाएको छ । उनीहरुले सर्लाहीको गोडैता नगरपालिका–२ का मोहम्मदको उपचारका क्रममा त्रिवि शिक्षण अस्पतालमा मृत्यु भएको छ । उनको शरीरका दायाँ हातमा एक राउण्ड, टाउकोमा २ राउण्ड र दायाँ तिघ्रामा १ राउण्ड गोली लागेको प्रहरीले जनाएको छ । उनी गोठाटारमै गार्मेन्ट व्यवसाय गरेर बस्दै आएका थिए । 

प्रहरीले अहिले अपराधीको खोजी कार्य तिव्र पारेको छ । उनीहरुलाई खोज्नका लागि उपत्यका सबै नाकाहरु सिल गरेको काठमाडौं प्रहरी परिसरले जनाएको छ ।