चोरीको लत लागेका एक किशोरले वृद्धाको हत्या गरेको छ । ६४ वर्षीया वृद्धाको हत्या गर्ने १८ वर्षीय किशोरलाई मंगलवार प्रहरीले सार्वजनिक गरेको छ । 

सुनसरीको धरान २० मा भदौ २९ गते ६४ वर्षीया पूर्णसरी राईको हत्या गर्ने १८ वर्षीय नकुल राईलाई प्रहरीले पक्राउ गरी सार्वजनिक गरेको हो । उनले हत्या गरेको स्वीकारेको प्रहरीले जनाएको छ । वृद्धको घरमा चोरी गर्ने उद्धेश्यले गएको र उनले थाहा पाएपछि हत्या पनि गरेको किशोरले प्रहरीलाई बयान दिएका छन् । प्रहरीका अनुसार ति किशोरलाई सानै उमेरमा कुखुरा चोर्ने लत बसेको थियो । उनी ति वृद्धाको घरमा सिक्री चोर्ने उद्धेश्यले गएका थिए । 

घरमा पूर्णसरी मृत भेटिएसँगै अनुसन्धान थालेको प्रहरीले दुई दिनअघि मोरङबाट नकुललाई पक्राउ गरेको थियो । उनी पक्राउ परेपछि हत्याको घटनामा चोरी तथा लुटपाट प्रमुख कारण रहेको खुल्न आएको जिल्ला प्रहरी कार्यालय सुनसरीका प्रहरी उपरीक्षक प्रभु ढकालले बताए । 

वृद्धाको हत्यापछि सिक्री लुकाउन सघाउने भोक्राहा नरसिंहका २० वर्षीय युवक रञ्जितकुमार साहलाई समेत प्रहरीले पक्राउ गरी सार्वजनिक गरेको छ । पत्रकार सम्मेलनमा दिइएको जानकारी अनुसार नकुलले एक हप्ता अघिबाटै चोरीको योजना बनाएका थिए । सोही अनुसार गहना लुट्ने क्रममा वृद्धाउपर खुकुरी प्रहार गरी गहना लुटेर फरार थिए । 

उनी लागुऔषध सेवनकर्तासमेत रहेको पाइएको प्रहरीले जनाएको छ । सुनसरी प्रहरीले पक्राउ परेको दुवैजना उपर कानूनी कारबाहीको प्रक्रिया अघि बढाइएको जनाएको छ ।