बारामा एकै परिवारका तीन जनाको हत्या भएको छ । बाराको प्रसौनी गाउँपालिका–५ प्रष्टोका गाउँका २५ वर्षीया सुजाता चौधरी, उनकी छोरी ३ वर्षीया ताहिरा चौधरी र १६ महिनाका छोरा राजवीर चौधरीको हत्या भएको प्रहरीले जनाएको छ । 

उनीहरुको घाँटी रेटेर हत्या गरिएको अवस्थामा शव भेटिएको जिल्ला प्रहरी कार्यालय बाराका प्रमुख प्रहरी उपरीक्षक (एसपी) होबिन्द्र बोगटीले लोकान्तरलाई जानकारी दिए । प्रहरीको प्रारम्भिक अनुसन्धानमा उनीहरूको हत्या भएको देखिएको छ । प्रहरीले हत्या गरेको आशंकामा सुजाताका पतिलाई नियन्त्रणमा लिएको छ । 

तीनैजनाको शव भेटिएको स्थानभन्दा केही पर सुजाताका पति घाइते अवस्थामा भेटिएपछि उनलाई नियन्त्रणमा लिइएको प्रहरीले जनाएको छ । उनी पत्नीसहित छोरी र छोराको हत्या गरेर भाग्ने क्रममा दुर्घटना भई घाइते भएको हुनसक्ने प्रहरीको अनुमान छ । यद्यपि, घटनाको विषयमा थप अनुसन्धान भइरहेको प्रहरीले जनाएको छ । 

प्रहरीका अनुसार उनीहरू सबैजना गँगटा मार्न घरबाट निस्किएका थिए । प्रारम्भिक अनुसन्धानमा घरायसी विवादका कारण उनले परिवारका सदस्यहरूको हत्या गरेको  हुनसक्ने आशंका गरिएको छ ।