चौधरी ग्रुप अन्तर्गत रहेको सीजी एग्रोले नानो युरिया झोल मलको बिक्री वितरण शुरू गरेको छ ।

कम्पनीले आइतवार एक कार्यक्रम आयोजना गरि नानो युरिया झोल मलको बिक्री शुरू गरिएको जानकारी दिएको हो । 

कार्यक्रममा भारतका पूर्व केन्द्रीय रेलवे मन्त्री सुरेस प्रभु तथा चौधरी ग्रुपका प्रबन्ध निर्देशक निर्माण चौधरीले संयुक्त रूपमा नानो युरिया मल नेपाली बजारमा भित्रिएको घोषणा गरे ।

कम्पनीले हाल नेपालमा कृषि उत्पादन बढाउन माटोको गुणस्तर सुधार्न, वातावरण प्रदूषण रोक्न, किसानको आम्दानी बढाउन कृषिमा लागत घटाउन यो मल उपयुक्त हुने दाबी गरेको छ। 

भारतको इन्डियन फार्मर फर्टिलाइजर कोअपरेटिभ लिमिटेडसँग मिलेर सीजी एग्रोले युरिया झोल मल नेपालमा ल्याएको हो । 

मलको नाम सीजी–आईएफएफसीओ राखिएको छ । 

यो युरिया झोल मल अन्नवाली,  दाल, तरकारी लगायतमा प्रयोग गर्न सकिने कम्पनीको भनाइ छ । 

यस मलले परम्परागत रासायनिक मलको मात्रा घटाउने कम्पनीले जनाएको छ  । 

यस मलले विरुवाको उचित वृद्धि र विकासका लागि आवश्यक पर्ने प्रमुख पोषक तत्व नाइट्रोजन प्रदान गर्दछ । 

यो मल बालीको पात वा बोटविरुवामा छर्किएर प्रयोग गरिन्छ। 

यस झोल मलले परम्परागत रसायनिक युरियाको तुलनामा माग आधाले घटाउने कम्पनीको दाबी छ । 

'१ बोरा परम्परागत युरिया ५०० मि. लि. नानो युरिया बराबर हुन्छ,' कम्पनीले एक विज्ञप्ति जारी गर्दै भनेको छ ।

कसरी प्रयोग गर्ने ?

१ लिटर सफा पानीमा २ देखि ४ मिलिलिटर नानो युरिया झोल मल मिसाएर बालीको पातमा छर्कन सकिन्छ | 

राम्रो परिणामको लागि बालीनाली लगाएको ३० देखि ३५ दिन पछि र फूल फुल्ने एक हप्ता अघि दुई पटक छर्किनु पर्दछ । 

कम्पनीका अनुसार, यो मल प्रयोग गर्नु अघि बोतल राम्रोसँग हल्लाउनु पर्छ ।

मललाई बालबालिका र जनावरहरूको पहुँचबाट टाढा राख्नुपर्छ साथै छर्कदा मास्क र पञ्जा लगाउनुपर्छ ।

यसलाई सामान्य तापक्रममा भन्डारण गर्न सकिने  कम्पनीले जनाएको छ ।

सामान्यतया ५०० मि. लि. नानो युरिया एक एकड क्षेत्रमा स्पेयर, ड्रोन, पावर स्प्रेयर आदिमार्फत स्पेर गर्ने पर्याप्त हुने कम्पनीको भनाइ छ ।