०५ साउन २०८३, मंगलबार
नेपाली कांग्रेसका मानबहादुर लिम्बूले प्रदेश सभाको निर्वाचनमा समानुपातिक बन्द सूचीमा नाम पार्नका लागि बल गरेका थिए । तर, उनलाई पाटीले पत्याएन । त्यसपछि उनले प्रत्यक्षमा चुनाव लड्नका लागि टिकट लिन दौडधुप गरे ।
मोरङ क्षेत्र नम्बर ३ को प्रदेश सभा १ बाट उम्मेदवारका लागि नेपाली कांग्रेस क्षेत्रीय समितिले उनीसहित चार जनाको नाम सिफारिस गरेको थियो । तर, उनले टिकट पाएनन् । शेखरचन्द्र थापाले टिकट हत्याए । तर, शेखरले मनोनयन दर्ता गर्न मात्रै भ्याए । टिकट पाएपछि लिम्बू शेखरलाई चुनाव जिताउने अभियानमा खट्ने तयारीमा थिए । मनोनयन दर्ता गरेको भोलिपल्ट नै थापा बिरामी भएर अस्पतालमा भर्ना भए ।
थापालाई डेंगु संक्रमण भएपछि नोबेल अस्पतालमा भर्ना गरिएका थिए । उपचारकै क्रममा थापाको निधन भयो । थापाको निधन भएपछि पुनः टिकटका लागि नेताहरूको दौडधुप शुरु भयो । मृतक थापाकै श्रीमती लक्ष्मी थापाले पनि इच्छा राखेकी थिइन् । तर, पाटीले लिम्बूलाई टिकट दियो । लिम्बू कांग्रेसका महामन्त्री विश्वप्रकाश शर्माका समकक्षी हुन् ।
पार्टीको सक्रिय राजनीतिमा लागेको ३७ वर्षपछि लिम्बूले बल्ल प्रदेश सभाको टिकट पाए । नेविसंघको राजनीतिमार्फत सक्रिय भएका लिम्बू ५४ वर्षका भए । नेविसंघको मोरङ जिल्ला अध्यक्ष, तरुण दलको जिल्ला सचिव, पाटीको जिल्ला समिति सदस्य भएका थिए । १३औँ जिल्ला अधिवेशनमा उनी जिल्ला सचिवमा पराजित बनेका थिए । १४ औँ महाधिवेशनमा भने महासमिति सदस्यमा निर्वाचित भएका थिए ।
लिम्बूले १८ हजार २८६ मत ल्याएका छन् भने उनका निकटतम प्रतिस्पर्धी एमालेका दिलीपकुमार राईले १३ हजार ८५८ मत पाएका छन् । गणना गर्न बाँकी भएको मतभन्दा लिम्बूले पाएको मत बढी छ ।
बेलबारी–१० को ३ हजार २३३ मत गणना गर्न बाँकी छ । उनले ४ हजार ४ सय २८ मतले अग्रता लिइसकेका छन् । बाँकी रहेको मतले लिम्बूको जितलाई रोक्न सक्ने छैन ।
