सवारी चालक अनुमतिपत्र (लाइसेन्स) को ट्रायल परीक्षामा ७० प्रतिशत अंक ल्याए उत्तीर्ण हुने गरी बनाइएको नियम लागू गर्न फेरि व्यवधान देखिएको छ । बागमती प्रदेश सरकारले आइतबारबाट यो नियम लागू गर्ने भनिएपनि विवादका कारण फेरि रोकिन पुगेको हो । 

 प्रदेशको श्रम, रोजगार तथा यातायात मन्त्रालयले लागू गर्न लागेको यो नियम पर्याप्त  छलफल  र  तयारी  नपुगेको  उल्लेख  गर्दै रोकिएको जनाइएको छ । मन्त्रालय र प्रदेशका मुख्यमन्त्री तथा  मन्त्रिपरिषद्  कार्यालयबीचको  विवादका  कारण नयाँ अङ्कभार प्रणाली रोकिएको बताइएको छ । 

 मुख्यमन्त्री तथा मन्त्रिपरिषद् कार्यालयले पत्राचार गर्दै तत्काललाई नयाँ व्यवस्था कार्यान्वयन नगर्न भनेपछि आइतबार काठमाडौँको चाबहिलस्थित यातायात व्यवस्था कार्यालयबाट लाइसेन्सको ट्रायलमा नयाँ प्रणालीको उद्घाटन गर्ने कार्यक्रम रोकिन पुग्यो ।

मन्त्रालयका प्रवक्ता हरिहर पोख्रेलले मुख्यमन्त्री तथा मन्त्रिपरिषद् कार्यालयबाट लाइसेन्सको ट्रायलमा नयाँ प्रणालीमा जाने निर्णय हाललाई रोक्न पत्र प्राप्त भएकाले तत्काललाई उक्त  प्रणालीमा  जाने  मन्त्रालयको  निर्णय  कार्यान्वयन टरेको बताए ।