एक जिल्ला न्यायाधीशमाथि वैवाहिक बलात्कारको आरोप लागेको छ ।

पीडित भनिएकी महिलाले प्रहरीले उजुरी लिन नमानेको भन्दै राष्ट्रिय महिला आयोगमा उजुरी गरेकी छन् ।

उजुरीकर्ता ती न्यायाधीशकै कान्छी श्रीमती रहेको पाइएको राष्ट्रिय महिला आयोगकी प्रवक्ता चमिला भट्टराईले जानकारी दिइन् ।

'आफ्नै श्रीमानले मलाई बलात्कार गर्नुभएको हो। त्यस विषयमा जिल्ला प्रहरी कार्यालयमा उजुरी गर्दा पनि केही सुनुवाई नहुँदा न्यायका लागि महिला आयोग आएकी हुँ भन्दै उहाँको कान्छी श्रीमती आउनुभएको थियो,' आयोगकी प्रवक्ता भट्टराईले लोकान्तरसँग भनिन्, 'त्यस विषयमा के कस्तो कारवाही भएको हो भनेर हामीले प्रहरीलाई सोधेका छौं। तर, हालसम्म जिल्ला प्रहरी कार्यालयबाट केही जवाफ आएको छैन।' 

पीडित भनिएकी महिलाले न्याय परिषदमा समेत उजुरी गरेकी छन् । न्याय परिषद सचिवालयका प्रवक्ता मानबहादुर कार्कीले पनि उजुरी आएको पुष्टि गरेका छन्।

'उजुरी आए पनि त्यसको कन्टेन्ट मैले हेरेको छैन। न्याय परिषदले  न्यायाधीशको आचरणका विषयमा हेर्ने हुनाले परिषदका सदस्यहरूले त्यस विषयमा छानबिन गर्नुहुन्छ,' कार्कीले लोकान्तरसँग भने।

यता ती न्यायाधीश भने बिदा लिएर घर बसेका छन्।

आमाको उपचारका लागि भन्दै उनी १५ दिनको बिदामा बसेको उनी कार्यरत जिल्ला अदालतका तहसिलदारले लोकान्तरलाई जानकारी दिए ।