३२ असार २०८३, बिहीबार
दुई वर्षअघि निर्माण घोषणा भएको रघुनाथ सापकोटाको फिल्म ‘चिलगाडी’ निर्देशनको जिम्मा ‘मन्त्र’का निर्देशक खिलबहादुर गुरुङले पाएका छन् । बिहीवार रंग पत्रकार रहेका सापकोटा र निर्देशक गुरुङबीच कागजी सम्झौता भएको हो ।
फिल्मको घोषणा हुँदा निर्देशकमा जनकदीप पराजुली भएपनि उनले कार्यव्यस्तताका कारण समय दिन नभ्याउने भएपछि ‘मन्त्र’का निर्देशक गुरुङलाई अनुबन्ध गरिएको हो । कोभिड्का कारण निर्धारित समयमा छायाँकनमा जान नसकिएको बताउँदै निर्माता सापकोटाले अब भने फिल्मको छायांकन सुरु गर्ने तयारीमा लागेको जानकारी दिए । आफ्नो फिल्मको निर्देशक फाइनल भएसँगै अब कलाकार छनोटको कार्य सुरु हुने उनले बताए । फिल्मको पटकथा तथा संवाद यम थापाले लेखेका हुन् ।
आगामी माघबाट छायांकन सुरु गर्ने तयारी रहेको सापकोटाले बताए । फिल्मलाई सागर प्रधानले खिच्नेछन् भने अर्जुन पोखरेलको गीतमा संगीत रहनेछ । निर्देशक गुरुङका अनुसार सामाजिक विषयवस्तुमा आधारित भएर हास्य प्रधान फिल्म निर्माण हुनेछ । ‘चिलगाडी’ले युवापुस्ताको प्रतिनिधित्व गर्दै महत्त्वपूर्ण सन्देश दिने निर्माता सापकोटा बताउँछन् ।
सापकोटाको प्रोडक्सन हाउस सेलिब्रेटी नेपालको ब्यानरमा यो फिल्म निर्माण हुन लागेको हो ।
