कर्णाली प्रदेश सभाको दोस्रो कार्यकालको पहिलो बैठक सोमवार बस्दैछ । 

ज्येष्ठ सदस्य विनोदकुमार शाहले अधिवेशन शुरू हुनुअघि कार्यसूची तय गर्न सर्वदलीय बैठक बोलाएका छन् ।

प्रदेशसभा बैठक दिउँसो १ बजे बस्दैछ भने ज्येष्ठ सदस्य शाहले बिहान ११ बजे सर्वदलीय बैठक बोलाएका हुन् । 

यसअघि कर्णाली प्रदेश सरकारको सिफारिसमा प्रदेश प्रमुख तिलक परियारले नेपालको संविधानको धारा १८३ (१) बमोजिम अधिवेशन आह्वान गरेका थिए । सर्वदलीय बैठकमा सभा सञ्चालन, दलका नेताहरूले बोल्न पाउने समय बाँडफाँट, विषयवस्तु निर्धारण लगायतका विषयमा छलफल हुने बताइएको छ । 

प्रदेश सभामा १ स्वतन्त्रसहित ५ राजनीतिक दलको प्रतिनिधित्व छ । ४० सदस्यीय प्रदेश सभामा नेपाली कांग्रेस १४, नेकपा माओवादी केन्द्र १३, नेकपा एमाले १०, राप्रपा, नेकपा एकीकृत समाजवादी र स्वतन्त्रका १/१ छन् ।