विश्वकै सुन्दर रारातालमा गत वर्षभन्दा यो वर्ष ४० प्रतिशतले पर्यटक घटेका छन् ।

मुगुको सदरमुकाम गमगढीस्थित रारातालमा यो वर्ष आन्तरिक तथा बाह्य पर्यटक ४० प्रतिशतले घटेको रारा राष्ट्रिय निकुञ्जका प्रमुख संरक्षण अधिकृत विश्वबाबु श्रेष्ठले  जानकारी दिए ।

देशकै पर्यटकको मुख्य गन्तव्यको रूपमा रहेको रारामा पछिल्लो समय बाह्य देशका पर्यटकको सङ्ख्या ह्वात्तै घटेको हो ।

यहाँको होटालका साथै कर्णाली राजमार्गको स्तरोन्नति नहुँदा पर्यटकलाई आवयक सुविधा दिन नसकिएकाले बाह्य र आन्तरिक पर्यटक पनि घटेको उहाँको भनाइ थियो ।

'रारातालको सौन्दर्यले पर्यटनलाई लोभ्याए पनि यहाँ आइपुगेका पर्यटकले राम्रोभन्दा नराम्रो कुराको सन्देश फैलाउँदा नयाँ आउने पर्यटकलाई पनि असर परेको छ । राजमार्ग हुँदै आउने पर्यटकले सडकको राम्रो व्यवस्था नहुँदा निकै सकस हुने गुनासो गरेका छन्,' प्रमुख संरक्षण अधिकृत  श्रेष्ठले भने ।

रारासम्म पर्यटकलाई सहजरुपमा पुर्‍याउन सके यहाँको आम्दानीमा निकै टेवा पुग्ने भएकाले स्थानीय र प्रदेश सरकारले यहाँको व्यवस्थापनमा ध्यान दिन आवश्यक रहेको उनले बताए।

राजस्व वृद्धिदर पनि यो आर्थिक वर्ष ३० प्रतिशतले घटेको निकुञ्ज कार्यालयले जनाएको छ । 

पर्यटकीय हबको रूपमा विकास भएको रारातालमा  पर्यटकलाई आकर्षण गर्न यहाँका सरोकारवाला निकाय र स्थानीय सरकारको काँधमा जिम्मेवारी थपिएको स्थानीयवासीको भनाइ थियो ।

राराभित्र प्रवेश शुल्क नेपालीका लागि  प्रतिव्यक्ति १०० रुपैयाँ, सार्क मुलकका नागरिकलाई १३ प्रतिशत भ्याटसहित एक हजार पाँच सय रुपैयाँ र अन्य विदेशीलाई १३ प्रतिशत भ्याटसहित तीन हजार लाग्ने गरेको निकुञ्ज कार्यालयले जनाएको छ ।

तालको सुन्दरता

रारा पुग्ने सबैले यहाँको सुन्दरताको वर्णन गर्न थाल्छन् । समुद्री सतहदेखि दुई हजार नौ सय ९० मिटर उचाइमा रहेको तालको प्रत्यक्ष अवलोकन गर्ने ठूलो धोको सबैलाई हुन्छ ।

प्रकृतिको काखमा रहेको त्यहाँको अनुपम दृश्य नियाल्ने रहरले कर्णाली प्रदेशको राजधानीबाट सुर्खेत–दैलेख–कालीकोट–जुम्ला हुँदै राराताल पुग्न सडक मार्ग रोज्नेको यात्रा निकै रमालो र सकस पनि हुन्छ । जब रारा ताल भेटिन्छ तब बाटोमा भोगिएका  कष्ट त्यो रमणीयस्थलले मेट्नाका साथै तालसँग फोटो खिच्नेको भीड लाग्ने गर्छ ।