कांग्रेस नेता पूर्णबहादुर खड्काले कलाकार वा खेलाडी लोकप्रिय भए भन्दैमा बलात्कारको अभियोग लागेका व्यक्तिलाई उन्मुक्ति दिने कुरा गाह्य नहुने बताएका छन् ।

सामाजिक संजालमा लेख्दै उपसभापति खड्काले क्रिकेटर सन्दीप लामिछानेप्रति संकेत गर्दै बलात्कार मुद्दा लागेपछि क्रिकेट खेल्न उन्मुक्ति दिनु ग्राह्य नहुने बताएका हुन् ।

‘कोही नेता लोकप्रिय होलान्, कोही कलाकार लोकप्रिय होलान्, कोही खेलाडी लोकप्रिय होलान् ? यो बेग्लै कुरा हो। तर बलात्कारको अभियोग वा कुनै पनि अभियोग लागेको व्यक्तिलाई कुनै पनि खालको उन्मुक्ति दिने कुरा ग्राह्य हुन सक्तैन। सम्बन्धित संस्थाको तत्काल  गम्भीर ध्यान जाओस् ।’

कांग्रेसकै बैतडी जिल्ला सभापति रहेका चतुरबहादुर चन्द नै क्यानका अध्यक्ष छन् । तर लामिछानेविरुद्ध मुद्दा अदालतमा विचाराधीन रहे पनि क्यानले उनलाई क्रिकेट खेल्न फुकुवा गरेपछि आलोचन बढेको छ ।

शुक्रबार कांग्रेस महामन्त्रीद्वय गगन थापा र विश्वप्रकाश शर्माले विज्ञप्ति जारी गर्दै सन्दीपलाई क्रिकेट खेल्न अनुमति दिएकोमा विरोध जनाएका हुन् ।

उच्च अदालतले सन्दीपलाई धरौटीमा रिहा गरे पनि उनको मुद्दा किनारा लागिसकेको छैन ।

सन्दीपलाई धरौटीमा रिहा गरेपछि सरकारी वकिलहरू सर्वोच्च अदालत पुगेका छन् । सर्वोच्चले सन्दीपको मुद्दाका सबै विवरणहरू झिकाउन शुक्रबार निर्देशन दिएको छ ।