काठमाडौँ । नक्कली सवारी चालक अनुमति पत्र सहित ललितपुरको पुल्चोकबाट एक महिलालाई आइतबार ट्राफिक प्रहरीले नियन्त्रणमा लिएको छ ।

 कास्कीको पोखरा जैमरी घर भई हाल ललितपुरको नखिपोट बस्दै आएकी ३५ वर्षीया कञ्चन गुरुङलाई ट्राफिक प्रहरीले नियन्त्रणमा लिएको हो । गुरुङले चलाएको बा ७८ प ५५ १० नम्बरको स्कुटर ट्राफिक प्रहरीले रोकेर चेक गर्दा गुरुङको साथबाट गंगा तामाङको नाममा रहेको (०१-०६-००२४७९७० वर्ग के) र सोही नम्बरको (वर्ग ए, बी) फोटो फरक-फरक भएको दुई वटा सवारी चालक अनुमति पत्र फेला पारेको हो । 

गुरुङलाई २ थान सवारी चालक अनुमति पत्र र स्कुटर सहित थप अनुसन्धान तथा कारवाहीका लागी काठमाडौँ उपत्यका अपराध अनुसन्धान कार्यालय मिनभवन पठाइएको उपत्यका ट्राफिक कार्यालयका प्रवक्ता एंव प्रहरी बरिष्ठ उपरीक्षक राजेन्द्र प्रसाद भट्टले जानकारी दिए ।