बिरामीको उपचार गर्ने कोशी अस्पताल राजनीतिले आफै बिरामी पर्न थालेको छ ।

पाँच महिना नहुँदै मेडिकल सुपरिटेन्डेन्ट (मेसु) परिवर्तन हुने गरेका छन् । मन्त्री परिवर्तन हुन साथ त्यसको असर अस्पतालमा देखिने गरेको छ ।

राजनीतिक दबाबका कारण पाँच महिनामै डा.लक्ष्मीनारायण यादवलाई हटाएर डाक्टर रविराज सिंहलाई निमित्त मेसुको जिम्मेवारी तोकिएको छ ।

आइतबार बसेको प्रदेश मन्त्रिस्तरीय बैठकले सिंहलाई मेसु बनाएको हो । उनी कोशीका जुनियर डक्टर हुन् ।

११ औँ तह हुनुपर्ने भए पनि १० औँ तहलाई मेसु तोकिएको हो ।

यसअघि भदौ १६ गते अस्पतालका वरिष्ठ कन्सल्टेन्ट फिजिसियन डा. लक्ष्मीनारायण यादव मेसुमा नियुक्त भएका थिए ।

तत्कालीन स्वास्थ्य तथा जनसंख्या मन्त्री भवानी खापुङले उनलाई मेसुमा नियुक्त गरेका थिए ।

नेकपा एकीकृत समाजवादीका मोरङका नेताका दबाबमा उनलाई नियुक्त गरिएको थियो ।  

उनी वरिष्ठ फिजिसियन डाक्टर हुन् । लक्ष्मीभन्दा अगाडि पनि १० औँ तहकै यज्ञराज खरेल मेसुमा नियुक्त भएका थिए । उनले करिब ६ महिना प्रशासनिक नेतृत्व समालेका थिए । 

स्वास्थ्य तथा जनसख्या मन्त्री पदम गिरीले एमालेका स्थानीय नेताहरूको दबाबका कारण जुनियर डाक्टरलाई मेसुमा नियुक्त गरेपछि अस्पतालभित्र पनि ११ औँ तहका डक्टरहरू असन्तुष्ट भएका छन् ।

अस्पतालमा दुई जना ११ औँ तहका चिकित्सकहरू कार्यरत छन् ।  डा. दीपक सिग्देल र डा. रामनारायण चौधरी ११ औ तहका चिकित्सक हुन् ।

जुनियरलाई मेसुमा नियुक्त गर्ने प्रचलन बढ्दै जाँदा सिनियरहरू भने असन्तुष्ट हुने गरेका छन् ।

राजनीतिक  दबाबकै कारण मेसु नियुक्त गर्ने परिपाटीले प्रदेश १ कै पुरानो अस्पताल आफै थला पर्न थालेको डक्टरहरू बताउँछन् । 

२०७६ साल यता मात्रै ६ जना मेसु परिवर्तन भएका छन् ।

२०७६ अघि हालका स्वास्थ्य तथा जनसंख्या मन्त्रालयका सचिव डा. रोशन खड्का  कोशी अस्पतालका मेसु थिए ।

उनको २०७६ भदौ १ गते स्वास्थ्य मन्त्रालयमा सरुवा भएको थियो । तत्कालीन स्वास्थ्य मन्त्री उपेन्द्र यादवले डा.गुणराज लोहनीलाई मेसुमा नियुक्त गरेका थिए । लोहनी ४ महिना पुरा नगर्दै मेसुबाट हटेका थिए ।

लोहनीपछि डाक्टर संगीता  मिश्र  मेसु बनेर आइन् । उपेन्द्रपछि स्वास्थ्य मन्त्री बनेका  भानुभक्त ढकालले संगीतालाई हटाएर डाक्टर चुमनलाल दासलाई मेसुमा नियुक्त गरे ।

संगीताले पनि ५ महिना मात्रै प्रशासन प्रमुख भएर काम गर्ने मौका पाएकी थिइन्  । 

दासलाई २०७७ असार १ गतेदेखि मेसु पदमा जिम्मेवारी प्रदान गरिएको थियो  । दासले भने झन्डै २० महिना प्रशासन प्रमुख भएर काम गरे ।

भानुभक्तपछि स्वास्थ्य मन्त्री बनेका विरोध खतिवडाले डाक्टर यादवराज खरेल मेसुमा नियुक्त गरेका थिए ।

२०७८ फागुन ५ गते उनले खरेललाई नियुक्त गरेका हुन् ।

भानुभक्त ढकाल मन्त्री भएका बेला कोशी अस्पताल विकास समितिमा एमालेका महेश प्रसाद भट्टराईको अध्यक्षतामा समिति बनाएको थियो । खतिवडाले फेरि अर्को समिति बनाएका थिए ।

पुरानो समिति अदालत गएको थियो । अदालतले भट्टराई नेतृत्वको समितलाई मान्यता दिएपछि मेसु र समितिबीच दूरी बढ्दै गएको थियो । 

विवादले लामो समयसम्म बैठक बस्न सकेको थिएन । अस्पतालको प्रशासनिक काममा नै असर गर्न थालेपछि तत्कालीन मेसु खरेलले बैठक राखेका थिए ।

अस्पतालकै डक्टरले बैठक बसेको माइन्युट नेकपा एकीकृत समाजवादीका नेतालाई फोटो खिचेर पठाइ दिएपछि उनलाई मेसुबाट हटाइएको थियो । 
 

बैठक नराख्ने शर्तमा स्वास्थ्य मन्त्री भवानी खापुङले लक्ष्मी नारायणलाई मेसु बनाएका थिए ।

अस्पताल विकास समितिको बैठक नबसेपछि अस्पताल विकास समितिले राखेका कर्मचारीलाई जागिर खुवाउनसमेत समस्या भएपछि मन्त्री खापुङलाई भेट्न यादव काठमाडौँ गएका थिए । कसैलाई खबर नगरी उनी काठमाडौँ गएका थिए ।

खापुङले पनि मंसिर ५ गते सुटुक्क बैठक बस्न भनेका थिए । ४ गते चुनाव हुन्छ भोलिपल्ट नै बैठक बसेर अस्पतालका समस्या समाधान गर्न भनेको खापुङनिकट स्रोतले जनाएको छ ।

तर उनले पनि बैठक राख्न सकेनन् ।

मेसु र अस्पताल विकास समितिबीच तनापकैबीच लक्ष्मी नारायण पनि मेसुबाट हटेका थिए । स्वास्थ्य मन्त्री पदम गिरीले पनि एमाले मोरङका नेताहरूको दबाबमा सिंहलाई मेसु पदमा नियुक्त गरेका हन् भन्ने बुझिएको छ ।

जुनियर डाक्टरलाई मेसुमा नियुक्त गरेपछि अस्पतालभित्र यतिबेला विवाद सिर्जना भएको छ।

राजनीतिक लाइन नमिल्दा अस्पताल विकास समिति र प्रशासन प्रमुखबीच बोलचालकै अवस्थासमेत बन्द हुन थालेको बताइन्छ।

कोशी अस्पताललाई नेपालकै पुरानो अस्पताल भनेर पनि चिन्ने गरिएको छ

१९२७ सालमा मोरङ रंगेलीमा स्थापना गरिएको यो अस्पताल । १९७१ सालमा जिल्लाको सदरमुकाम विराटनगर सार्दा अस्पताल पनि विराटनगर सारिएको थियो । त्यो भन्दा अगाडि मोरङको सदरमुकाम रंगेलीमा थियो ।