शेयरको भित्री कारोबारमा चलखेल गर्ने हाइड्रोपावर व्यवसायी गुरुप्रसाद न्यौपाने विरुद्ध जिल्ला अदालत काठमाडौँमा मुद्दा दायर भएको छ । 

रिडी पावर कम्पनीका तत्कालीन अध्यक्ष न्यौपानेले शेयरमा भित्री कारोबार (इन्साइडर ट्रेडिङ) गरेको भन्दै जिल्ला अदालत काठमाडौँमा बिहीबार मुद्दा दायर भएको हो ।

न्यौपानेले इन्साइडर ट्रेडिङ गरेर चलखेल गरी गरेको दाबी गर्दै सरकारी वकिल कार्यालयमार्फत नेपाल धितो पत्र बोर्डले बुधवार अदालतमा मुद्दा दायर गरेको छ ।

न्यौपानेले २०७७ चैत १९ देखि २०७८ साउन २४ सम्म खरिद–बिक्री गरेको विषय भित्री कारोबार भएको पुष्टि भएको भन्दै धितो पत्र बोर्डले मुद्दा अगाडि बढाएको हो । न्यौपानेले धितो पत्र ऐन २०६३ को दफा ९१ बमोजिम भित्री कारोबार गरेको पाइएकाले दफा १०१ को उपदफा (१) बमोजिमको सजाय माग गरिएको छ ।

न्यौपानेलाई धितो पत्र ऐन उल्लङ्घन गरेको जनाउँदै बोर्डले पहिलो चरणको कारबाही गरिसकेको छ । पहिलो चरणमा धितोपत्रसम्बन्धी ऐन २०६३ को दफा १०१ को उपदफा ७ अनुसार ७५ हजार रुपैयाँ जरिवाना र कुनै पनि सूचीकृत सङ्गठित संस्थाको १० वर्ष सञ्चालक हुन नपाउने गरी कारबाही गरिएको हो ।

धितो पत्र दर्ता तथा निष्कासन नियमावली २०७९ अनुसार सङ्गठित संस्थाको सञ्चालक, कार्यकारी प्रमुख, लेखापरीक्षक, कम्पनी सचिव वा सङ्गठित संस्थाको व्यवस्थापन वा लेखासम्बन्धी कार्यमा प्रत्यक्ष रूपले संलग्न व्यक्तिले यस्तो पदमा बहाल रहँदासम्म वा पदबाट अवकाश लिएको एक वर्षसम्म त्यो संस्था वा त्यसको सहायक कम्पनीको सेयर किनबेच तथा हस्तान्तरण गर्न पाउँदैनन् ।