०५ साउन २०८३, मंगलबार
छोरीले भागेर प्रेम विवाह गरेपछि भारतमा एउटा परिवारले उनको पिण्डदान गरिदिएको छ । घटना भारतको मध्येप्रदेशस्थित जबलपुर जिल्लाको हो ।
उनीहरूले ग्वारीघाटस्थित सिद्धघाटमा छोरीको पिण्ड दान गरेका छन् ।
ती युवतीका परिवारले मृत्यु भोज पनि खुवाएका छन् । उनीहरूले आफन्तलाई जानकारी दिन शोक सन्देश कार्ड पनि छपाएका थिए ।
कार्डमा छोरीको अप्रेल २ मा मृत्यु भएको उल्लेख छ ।
छोरीले भागेर बिहे गरेपछि समाजमा आफ्नो इज्जत गुमेको आमाको भनाइ छ । उनले आफ्ना लागि छोरी मरेसरह भएको बताइन् ।
ती युवतीका भाइले आफूहरूको कन्यादान गर्ने सोच भए पनि भागेर बिहे गरेकोले पिण्डदान गर्नु परेको बताए ।
२२ वर्षीया ती युवतीले २५ वर्षीय मोहम्मद अयाजसँग बिहे गरेकी थिइन् । उनीहरूले गत जनवरीमा बिहे गरेका थिए । उनीहरूले अदालतमा बिहे दर्तासमेत गरेका छन् । दैनिक भास्कर
