ललितानिवासको सरकारी जग्गा हिनामिना गर्ने काममा संलग्न रहेको भन्दै पक्राउ परेका सञ्चार मन्त्रालयका सचिव कृष्णबहादुर राउतलाई प्रतिवादी नबनाउने गरी सीआईबीले सरकारी वकिलको कार्यालयलाई प्रतिवेदन बुझाएको छ । 

नेपाल प्रहरीको केन्द्रीय अनुसन्धान ब्यूरो (सीआईबी)ले झण्डै ८ सय पेज लामो प्रतिवेदन मंगलवार सरकारी वकिलको कार्यालयलाई बुझाएको हो । 

२९० जनालाई प्रतिवादी बनाउन सिफारिश गरिएकोमा सचिव राउतको नाम उक्त सूचीमा नरहेको सीआईबी स्रोतले लोकान्तरलाई जानकारी दियो ।

‘२९० जनालाई प्रतिवादी बनाइएको छ, त्यसमा सचिव राउत हुनुहुन्न,’ सीआईबीका एक अधिकारीले लोकान्तरसँग भने । 

कागज गराइए पनि पूर्वप्रधानमन्त्रीद्वय माधव नेपाल र बाबुराम भट्टराईलाई पनि प्रतिवादी बनाइएको छैन । 

ललितानिवास जग्गा हिनामिना प्रकरणमा संलग्न रहेको भन्दै सीआईबीले सचिव राउतलाई असार २४ गते त्रिभुवन विमानस्थलबाट नियन्त्रणमा लिएको थियो ।

सर्वोच्चको आदेशबाट उनी साउन ५ गते रिहा भएका थिए ।