०५ साउन २०८३, मंगलबार
नेपाल प्रहरीको केन्द्रीय अनुसन्धान ब्यूरो (सीआईबी)ले विद्युतीय चुरोट (भेप)मार्फत भएको सुन तस्करी प्रकरणमा नेकपा (माओवादी केन्द्र)का उपाध्यक्ष कृष्णबहादुर महराविरुद्ध मुद्दा नचल्ने रायसहितको प्रतिवेदन बुझाएको छ ।
शुक्रवार जिल्ला सरकारी वकिलको कार्यालयमा बुझाइएको प्रतिवेदनमा महराविरुद्ध कुनै प्रमाण फेला नपरेकाले मुद्दा नचल्ने राय पेश गरिएको सीआईबीका एक अधिकारीले लोकान्तरलाई बताए ।
सीआईबीले बुझाएको प्रतिवेदनमा राहुल महरा, दाओजिन वाङका चालक लोकेन्द्र पौडेल र दावा छिरिङलाई मुद्दा चलाउन सिफारिस गरिएको छ भने फरार ६ जना चिनियाँ नागरिक भेटिएको बखतमा मुद्दा चल्ने राय समावेश छ ।
सुन तस्करमा संलग्न दाओजिन वाङसहित ६ जना फरार छन् । प्रहरीले ८ करोड ५७ लाख बिगो कायम गर्नुपर्ने राय दिएको छ ।
२०७९ माघ २९ गते त्रिभुवन अन्तर्राष्ट्रिय विमानस्थलको भन्सार कार्यालयले शंकास्पद लागेपछि सुटकेशभित्र रहेको ७३० थान इलेक्ट्रोनिक चुरोट (भेप) बरामद गरेको थियो ।
विभिन्न समूहहरूले छुटाउन दबाब दिएपछि भन्सार कार्यालयले अनुसन्धान थालेको थियो ।
पछि यस विषयमा अनुसन्धान गरेको सीआईबीले सरकारी वकिलको कार्यालयमार्फत असार २७ गते काठमाडौं जिल्ला अदालतमा मुद्दा दर्ता गरेको थियो ।
सीआईबीले बुझाएको प्रतिवेदनमा पूर्व सभामुख कृष्णबहादुर महरा र उनका छोरा राहुल महराको कनेक्सन चार्ट समेत उल्लेख थियो ।
सोहीकारण महराका बाबुछोरामाथि अनुसन्धान गर्न सरकारमाथि दबाब परेको थियो । राहुललाई पक्राउ गरेर अनुसन्धान गरे पनि महरासँग भने कागज मात्र गरिएको छ ।
