​प्रदेश प्रमुख परशुराम खापुङले मुख्यमन्त्री नियुक्तिका लागि शनिवारसम्मको समय माग गरेपछि बहुमत सांसदले रातभर धर्ना बस्ने तयारी गरेका छन् ।

नेपाली कांग्रेसका सांसद केदार कार्कीको नाममा बहुमत जुटाएका एमाले र कांग्रेसको डा. शेखर कोइराला समूहका सांसदले धर्नामा बस्ने तयारी गरेका हुन् । 

मुख्यमन्त्री नियुक्तिका लागि ४७ सांसदले बिहीवार निवेदन दिएका थिए । मुख्यमन्त्रीमा दावी पेश गर्ने समय शुक्रवार ५ बजेसम्म थियो । ५ बजेको समयमा ४७ जना सांसद परिचय पत्र बोकेर प्रदेश प्रमुखको कार्यालयमा पुगेका थिए । 

मुख्यमन्त्री नियुक्तिका लागि प्रदेश प्रमुखले शनिवारसम्मको समय माग गरेको एक सांसदले जानकारी दिए । ‘प्रदेश प्रमुखले भोलिसम्मको समय माग गर्नुभएको छ, चलखेल नहोस् भनेर हामी प्रदेश प्रमुखको कार्यालयमा धर्ना बस्ने तयारीमा छौं’ ती सांसदले लोकान्तरसँग भने । 

शेखर कोइराला पक्षले एमालेसँग मिलेर मुख्यमन्त्रीमा दावी गरेपछि नेपाली कांग्रेसका सभापति शेरबहादुर देउवाले शुक्रवार कार्यसम्पादन समितिको बैठक बोलाएका थिए । कोइराला अनुपस्थित भएपछि बैठक भोलिसम्मका लागि स्थगित भएको छ .

कांग्रेसले केन्द्रबाट कुनै निर्णय नगरेका कारण प्रदेश प्रमुखले भोलिसम्म समय माग गरेका हुन् । गठबन्धनको तर्फबाट मुख्यमन्त्रीमा दावेदारी पेश गरेका इन्द्र आङ्बोलाई फिर्ता बोलाउने बारे समेत कांग्रेस र माओवादीबीच छलफल चलिरहेको छ ।