०३ साउन २०८३, आइतबार
अहिलेको चर्चित हास्य टेलिश्रृङखला ‘सक्किगोनि’को टिमले चलचित्र निर्माणको तयारी गरेको धेरै भइसकेको छ ।
यो टिमले ‘भद्रगोल’ टेलिसिरियल ल्याउँदा नै चलचित्र निर्माणको तयारी थियो । त्यतिबेला चलचित्रको नाम, निर्देशक र अभिनेतासमेत फाइनल भइसकेको थियो ।
सुरुवातमा चलचित्रलाई निर्देशक निश्चल बस्नेतले निर्देशन गर्ने तय भइसकेको थियो । उनले एडभान्स रकम समेत लगिसकेका थिए । यद्यपि, पछि उनले कथा चित्त नबुझेको भन्दै चलचित्र छाडे ।
त्यस्तै, सुरुवातमा चलचित्रको शीर्ष भूमिकामा अभिनेता विपिन कार्कीलाई फाइनल गरिएको थियो । तर, लामो समयसम्म चलचित्र बनेन् । बीचमा कोभिडका कारण पनि निर्माण टिमले चलचित्रतर्फ ध्यान दिएन ।
यद्यपि, अब भने ‘सक्किगोनि’ टिमले चलचित्रको निर्माणको तयारीलाई तीव्र रुपमा अगाडि बढाएको छ ।
आगामी महिना घोषणा गर्नेगरी तयारी भइरहेको ‘सक्किगोनि’स्रोतले जानकारी दिएको छ । ‘माघ १ गते निर्माण र नाम घोषणा गर्ने तयारी हो’ टिमभित्रका एक सदस्यले भने, ‘सोही योजनाअनुसार अहिले धमाधम स्क्रिप्टमा काम चलिरहेको छ ।’
सोसल–कमेडी जनरामा चलचित्र निर्माण हुनेछ ।
चलचित्रका लागि समय दिनुपर्ने भएकाले ‘सक्किगोनि’ टिमले सिरियलको छायांकन पनि दिनरात नभनी गर्ने गरेको छ ।
अर्जुन घिमिरे ‘पाँडे’ र कुमार कट्टेल ‘जिग्री’को लेखन एवं निर्देशन रहँदै आएको ‘सक्किगोनि’ निकै चर्चित टेलिसिरियल हो ।
सिरियलका अधिकांश पात्रहरू दर्शकमाझ निकै चर्चित छन् ।
