राष्ट्रिय सभा निर्वाचनका लागि कोशी प्रदेशमा नेकपा एमाले र राप्रपाले चुनावी तालमेल गर्ने भएका छन् ।

दुई दलबीच चुनावी गठबन्धन गरेर जाने सहमति भएको राप्रपा कोशी प्रदेश संसदीय दलका नेता भक्तीप्रसाद सिटौलाले बताए । ‘एमालेले हाम्रो पार्टीका उद्धव पौडेललाई सघाउने सहमति भएको छ’, सिटौलाले भने ‘हामीले एमालेकी रुक्मिणी कोइरालालाई सघाउँछौं ।’​​

सोमवार भएको छलफलमा एमालेका सचिव रघुवीर महासेठ, नेता शेरधन राई, हिकमतकुमार कार्की, प्रदेश अध्यक्ष घनश्याम खतिवडा, राप्रपाका प्रदेश अध्यक्ष राम थापा र नेता भक्ति सिटौला सहभागी थिए ।

नेपाली कांग्रेसका नेता कृष्णप्रसाद सिटौलालाई रोक्नका लागि एमाले–राप्रपाबीच सहमति भएको टिप्पणी नेताहरूले गरेका छन् ।

राप्रपालाई सघाउँदा सबै भोट नखस्ने डर एमालेलाई छ । त्यसैले गर्दा स्थानीय तहका जनप्रतिनिधिहरूसँग छलफल भइरहेको नेताहरू बताउँछन् ।

एकै तीरले दुई वटा सिकार गर्ने रणनीतिमा एमाले देखिन्छ ।​

अन्यतर्फ खुल्लामा राप्रपाका उद्धव पौडेल र एमालेका परशुराम अधिकारी उम्मेदवार छन् । राप्रपा उम्मेदवार पौडेल राष्ट्रिय स्वतन्त्र पार्टीका सभापति रवि लामिछानेका ससुरा हुन् ।

२०७९ को चुनावमा एमालेका अध्यक्ष केपी शर्मा ओली र राप्रपाका अध्यक्ष राजेन्द्र लिङ्देनबीच सहकार्य भएको थियो । राप्रपालाई राष्ट्रिय सभामा सघाएर आफ्नै कित्तामा राख्ने रणनीति एमालेको रहेको छ । ससुरालाई सघाएपछि रवि लामिछाने पनि विपक्षी मोर्चामा एमालेसँगै रहिरहने एमालेका नेताहरूको विश्लेषण रहेको छ ।

झापा, मोरङ, सुनसरी, उदयपुर, इलाम, पाँचथर, धनकुटा, तेह्रथुम संखुवासभा भोजपुर, खोटाङ, ओखलढुङ्गा र सोलुखुम्बुको कार्यक्रम सकेर कांग्रेसका सिटौला विराटनगर आइसकेका छन् ।

सिटौलालाई भोट माग्न डाक्टर शेखर कोइराला र महामन्त्री विश्वप्रकाश शर्मा, प्रदीप पौडेलले जिल्ला जिल्लामा पुगेर भोट मागेका थिए । कांग्रेसका सहमहामन्त्री भीष्मराज आङदेम्बे चुनावी कमान्डर बनेर खटिरहेका छन् । उनी सिटौला सँगसँगै सबै जिल्लामा गएका थिए । गगन थापालाई समेत विराटनगरमा ल्याउने तयारी सिटौला पक्षको रहेको छ ।

कोशी प्रदेशमै संस्थापन इतर समूहले विद्रोह गरेकाले संस्थापन इतरका नेताहरूलाई भेला गराएर सिटौलाले आफ्नो माहोल बनाइ रहेका छन् ।

कोशीमा एमालेको ४ हजार २१० र राप्रपाको ३९४ मतभार रहेको छ । यो मत जितका लागि पुग्ने बहुमत भने होइन ।

कोशीमा गठबन्धनका पनि कांग्रेस र माओवादीका मात्रै उम्मेदवार छन् ।

उम्मेदवार नभएका नेकपा (एकीकृत समाजवादी) र जनता समाजवादी (जसपा)को समेत मत तान्ने रणनीतिमा एमाले रहेको छ ।

नेकपा एसको ३४५, जसपाको १२९ र स्वतन्त्रहरूको ५७ मत रहेको छ । यी सबैलाई एकत्रित गर्न सके ५ हजार १३५ मत प्राप्त गर्ने रणनीतिमा एमाले–राप्रपा रहेका छन् ।​

कांग्रेसको ३ हजार ७२२ र माओवादीको १ हजार २७८ मात्रै हुने छ । उक्त मत भार ५ हजार मात्रै हुन्छ । अन्य गठबन्धनमा रहेका जनप्रतिनिधिहरूको मत चोर्ने एमाले राप्रपाको तयारी रहेको छ ।​

यस्तो छ अंकगणित 

कोशी प्रदेशमा स्थानीय तहका २७४ (प्रमुख/उपप्रमुख) र प्रदेशका ९३ (सांसद) गरी कूल ३६७ मतदाता छन् । निर्वाचनमा प्रदेश सभा सदस्यको मतभार ५३ र स्थानीय तहका प्रमुख तथा उपप्रमुखको मतभार १९ कायम गरिएको छ ।

प्रदेश सभाका ९३ सांसदमध्ये एमालेका ४०, कांग्रेसका २९, माओवादी केन्द्रका १३, राप्रपाका ६, एकीकृत समाजवादीका ४  र जसपाका १ जना छन् ।

प्रदेश सभातर्फ एमालेको २१२०, कांग्रेसको १५३७, माओवादीको ६८९, राप्रपाको ३१८, एकीकृत समाजवादीको २१२ र जसपाको ५३ मतभार छ । 

स्थानीय तहका प्रमुख र उपप्रमुखमा प्रदेशमा रहेका १३७ पालिकाका २७४ मध्ये एमालेका ११०, कांग्रेसका ११५, माओवादीका ३१, राप्रपाका ४, एकीकृत समाजवादीका ७, जसपाका ४ र स्वतन्त्र ३ जना छन् । पालिकामा एमालेको २०९०, कांग्रेसको २१८५, माओवादीको ५८९, राप्रपाको ७६, एकीकृत समाजवादीको १३३, जसपाको ७६ र स्वतन्त्रको ५७ मतभार छ ।

प्रदेशमा एमालेको कूल मतभार ४ हजार २१०, नेपाली कांग्रेसको ३ हजार ७२२ र माओवादी केन्द्रको १ हजार २७८ रहेको छ । यस्तै एकीकृत समाजवादीको ३४५, राप्रपाको ३९४, जसपाको १२९ र स्वतन्त्रको ५७ मतभार रहेको छ । गठबन्धन कायम रहँदा गठबन्धनको पक्षमा ५४८३ मतभार हुनेछ, जुन एमालेको भन्दा १२६४ ले बढी हो ।

स्वतन्त्रमा धरानका मेयर हर्क साम्पाङ, भोजपुरको साल्पासिलिछो गाउँपालिकाका प्रमुख दौलथ कुलुङ र ओखलढुङ्गाको माने भञ्ज्याङ गाउँपालिकाका प्रमुख ज्ञानेन्द्र रुम्दाली रहेका छन् ।

मेयर साम्पाङले कता मतदान गर्छन् भन्ने टुंगो नभए पनि अन्य दुईजनाले कहाँ मतदान गर्छन् भन्ने टुंगो लागिसकेको नेताहरूको भनाइ छ । कुलुङ एमाले र रुम्दाली कांग्रेसका बागी हुन् ।