नेपाली सेनाको सबैभन्दा उच्चस्तरको 'हायर कमाण्ड तथा म्यानेजमेन्ट तालिम' शुरू भएको छ ।

नेपाली सेनाका बलाधिकृत रथी अशोकराज सिग्देलले शुक्रवार एक कार्यक्रमका बीच उक्त तालिमको शुभारम्भ गरेका हुन् ।

सहभागी शिक्षार्थीहरूलाई सम्बोधन गर्दै रथी सिग्देलले तालिमको दौरान विविध सैनिक विषयका साथै राष्ट्रिय हित, त्यसको सम्बर्द्धर प्रबर्द्धन गर्ने तरिका, राष्ट्रिय सुरक्षा नीति तथा रणनीति लगायतका विषयमा ज्ञान आर्जन हुने बताए ।

उनले तालिममा सहभागी अधिकृतहरू निकट भविष्यमा उच्च तहका विभिन्न महत्त्वपूर्ण नियुक्तिमा रही कार्य गर्नुपर्ने बताए ।

साथै त्यस्ता नियुक्तिमा रहने पदाधिकारीहरूको सल्लाह, सुझाव एवं उनीहरूले लिनुपर्ने निर्णयहरू राष्ट्रिय सुरक्षासँग जोडिने भएकाले कुनै पनि विषयको विश्लेषण गर्दा तटस्थ रही राष्ट्र र संस्थाको हितमा निर्णय गर्न तथा योजनाहरू बनाउन उनले सुझाव दिए ।

उनले तालिम पश्चात् सहभागी अधिकृतहरूलाई राष्ट्रिय तथा अन्तर्राष्ट्रिय क्षेत्रमा विभिन्न सैनिक तथा गैर सैनिक व्यक्तिहरूसँगै मिलेर काम गर्न सक्ने क्षमता, ज्ञान र आत्मविश्वास अभिवृद्धि हुने विश्वास व्यक्त गरे ।

तालिममा ३५ जना महासेनानी दर्जाका शिक्षार्थीहरूको सहभागिता रहेको छ ।

नेपाली सैनिक वार कलेजमा आयोजित तालिमको शुभारम्भ समारोहमा रथीवृन्द तथा अधिकृतहरूको उपस्थिति थियो ।