हङकङसँगको अन्तर्राष्ट्रिय मैत्रीपूर्ण टी–२० क्रिकेटमा नेपाल ७३ रनले पराजित भएको छ । 

घरेलु टोली हङकङले दिएको २१३ रनको लक्ष्य पछ्याएको नेपाल १६.४ ओभरमा सबै विकेटको क्षतिमा १३९ रनमा समेटिएको थियो । 

मोङकोकस्थित मिसन रोड क्रिकेट मैदानमा शनिवार भएको खेलमा नेपालका लागि विनोद भण्डारीले सर्वाधिक ४२ रन बनाए । उनले २२ बलमा चार चौका र तीन छक्काको सहयोगमा उक्त रन बनाएका हुन् ।

यस्तै आरिफ शेखले ३८ र कप्तान रोहितकुमार पौडेलले ३० रन बनाए । नेपाललाई सस्तैमा समेट्न बलिङमा हङकङका यासिम मुर्ताजले सर्वाधिक चार विकेट लिए । 

यसअघि टस हारेर पहिले ब्याटिङ गरेको हङकङले निर्धारित २० ओभरमा ६ विकेटको क्षतिमा २१३ रन बनाएको थियो ।

हङकङका लागि बाबर हायतले शतकीय पारी खेले उनले ४९ बलमा १३ छक्का र तीन चौकाको सहयोगमा ११० रन बनाए । 

बलिङमा नेपालका आकाश चन्दले तीन विकेट लिए । उनले यही खेलबाट नेपाली र टी–२० मा डेब्यू गरेका हुन् । यस्तै आरिफ शेख, प्रतिश जीसी, सागर ढकाल र रसिद खानले एक–एक विकेट लिए । 

नेपालले हङकङमै आइतवारदेखि त्रिकोणात्मक टी–२० अन्तर्राष्ट्रिय श्रृंखला खेल्दैछ । त्यसअघि नेपालले घरेलु टोली हङकङसँग मैत्रीपूर्ण कप खेलेको हो । श्रृंखलामा हङकङ, नेपाल र पपुवा न्युगिनी (पीएनजी) सम्मिलित छन् ।