०४ साउन २०८३, सोमबार
आगामी मंसिर १६ गते हुने स्थानीय तह उपनिर्वाचनमा अधिकांश ठाउँमा सत्तारुढ दल कांग्रेस र एमालेबीच नै प्रतिस्पर्धा हुने भएको छ ।
केन्द्र र प्रदेशको सत्तामा सँगै भए पनि दुई ठूला दलले आपसमा प्रतिस्पर्धा गरेर जाने गरी धमाधम उम्मेदवार तय गरिरहेका हुन् ।
४४ रिक्त स्थानमा हुने निर्वाचनका लागि नेपाली कांग्रेस, नेकपा एमाले, नेकपा माओवादी केन्द्रसहितका दलले धमाधम उम्मेदवार तय गरिरहेका छन् ।
मंसिर १६ गते २ जिल्ला समन्वय समितिका प्रमुख, १ नगरपालिका प्रमुख र १ उपप्रमुखमा निर्वाचन हुन लागेको हो ।
त्यस्तै, गाउँपालिका अध्यक्ष २, उपाध्यक्ष ४, नगरपालिका र गाउँपालिकाका वडाध्यक्ष ३४ गरी ४४ पदमा निर्वाचन हुन लागेको हो ।
त्यस्तै, कैलाली र ओखलढुंगा जिल्ला समन्वय समिति प्रमुखको पनि निर्वाचन हुँदैछ ।
स्थानीय आवश्यकताको आधारमा अन्तिममा केही ठाउँमा समीकरण बन्न सक्ने भए पनि घोषित रूपमा एक्लाएक्लै चुनाव लड्ने विषय दुवै दलको प्राथमिकतामा छ । कांग्रेस निर्वाचन समितिका सदस्य मधु आचार्य घोषित रूपमा स्थानीय तहको निर्वाचनमा तालमेल नहुने बताउँछन् ।
‘सत्तामा सँगै भए पनि कांग्रेस र एमाले दुवै दलले आ–आफ्नै हिसाबले धेरै ठाउँमा चुनाव लड्ने तयारी गरेका छन् । कांग्रेसले त घोषणा गरेरै एक्लै चुनाव लड्ने बताइसकेको छ’ आचार्यले भने, ‘वामपन्थी एक हौं भन्ने नाराले काम गरे हामीलाई गाह्रो पार्छन् । जति एक्लै चुनाव लड्ने भने पनि चुनावी गणितको रणनीति भनेजस्तो सजिलो हुँदैन । स्थानीय आवश्यकताको आधारमा एकदुई ठाउँमा अन्तिममा एलायन्स बन्न पनि सक्छ । तर, यो केन्द्रको नीतिअनुसार हुने छैन ।’
एमालेको सचिवालय बैठकले शनिबार ४४ मध्ये ३३ उम्मेदवार तय गरेको हो । एमाले उपमहासचिव प्रदीप ज्ञवालीले सबै ठाउँमा उम्मेदवार अगाडि सारेर जिताउनेतर्फ अग्रसर हुने निर्णय गरेको जानकारी दिए । नेपाली कांग्रेससँग सत्ता समीकरण भए पनि आ–आफ्नो हिसाबले प्रतिस्पर्धा गरेर जाने एमालेको भनाइ छ ।
मुख्य ठाउँमा कांग्रेस र एमालेबाट को–को बने उम्मेदवार ?
कीर्तिपुर नगरपालिका
एमालेले कीर्तिपुरको मेयरमा सुरेन्द्र मानन्धर र माओवादीले शिवलाल महर्जनको नाम सिफारिश गरेको छ । राप्रपाले पूर्व मेयर ध्रुव महर्जनलाई उम्मेदवार बनाउने तयारी गरेको छ । कांग्रेसबाट उम्मेदवार टुंगिन बाँकी छ ।
ग्रामथान गाउँपालिका
मोरङको ग्रामथान गाउँपालिकामा कांग्रेसले बलराम सरदारलाई उम्मेदवार बनाउने निर्णय गरिसकेको छ । सरदारलाई उम्मेदवार बनाउने निर्णय गरेको जानकारी मोरङ कांग्रेस सभापति डिकबहादुर लिम्बूले दिए । १७ आकांक्षीमध्ये कांग्रेसले सरदारलाई उम्मेदवार बनाएको हो ।
कांग्रेसबाट जितेका जयप्रकाश गच्छदारको मृत्यु भएपछि उपनिर्वाचन हुन लागेको हो । गच्छदारको गत असार ३ गते निधन भएको थियो ।
११ जना सिफारिश भएकोमा एमालेले तुलसीराम विश्वासलाई उम्मेदवार बनाएको छ । माओवादी केन्द्रले ग्रामथानको अध्यक्षमा कांग्रेसबाट भित्र्याइएका नमोनारायण माझीलाई उम्मेदवार बनाएको छ ।
महाबु गाउँपालिका
दैलेखेको महाबु गाउँपालिकाको अध्यक्षमा हुने उपनिर्वाचनलाई प्राथमिकता साथ हेरिएको छ । कांग्रेसले महाबुको उपाध्यक्षमा झलकबहादुर भण्डारीलाई अगाडि सारेको छ । एमालेले यहाँ उम्मेदवार टुंग्याइसकेको छैन ।
नलगाड नगरपालिका
जाजरकोटको नलगाड नगरपालिकाको उपमेयरमा एमालेले सुनिता बोहोरालाई उम्मेदवार बनाएको छ । कांग्रेसले नलगाडमा इन्द्रा चन्द सिंहलाई उम्मेदवार बनाउने भएको छ ।
कांग्रेसबाट निर्वाचित सरिता सिंहको निधन भएपछि उपनिर्वाचन हुन लागेको हो । इन्द्रा स्वर्गीय सरिताकै भाइबुहारी हुन् । पूर्वशिक्षक इन्द्रा कांग्रेसकी क्रियाशील सदस्य मात्रै हुन् ।
गौरीशंकर दोलखा
दोलखाको गौरीशंकर गाउँपालिकाको उपाध्यक्षमा कांग्रेसले पासदिकी तामाङलाई अगाडि सारेको छ । एमालेले उमा लुंगेली मगर शेर्पालाई उपाध्यक्षको उम्मेदवार बनाएको छ ।
माओवादीले निमलेकी शेर्पालाई उम्मेदवार बनाएको छ । यसअघि यहाँ गठबन्धन भए पनि यसपटक दलहरू एक्लाएक्लै प्रतिस्पर्धा उत्रिन लागेका हुन् ।
स्वामीकार्तिक खापर गाउँपालिका
बाजुराको स्वामीकार्तिक खापर गाउँपालिकाको उपाध्यक्षमा कांग्रेसले नेकपा एकीकृत समाजवादीको साथ लिएर उपाध्यक्षको उम्मेदवार उठाउन खोजेका छ ।
यसअघि कांग्रेस र माओवादीले गठबन्धन गरेर चुनाव जितेका थिए । माओवादीका उपाध्यक्षको निधन भएपछि हुन लागेको चुनावमा नेकपा एसले कांग्रेसलाई समर्थन गर्न खोजेको एक नेताले जानकारी दिए ।
एमालेले सुलोचनाकुमार भण्डारी बुढालाई उम्मेदवार बनाएको छ ।
सर्केगाड गाउँपालिका
हुम्लाको सर्केगाडमा एमालेले जाना शाहीलाई उम्मेदवार बनाएको छ । कांग्रेसले सविता बुढालाई उम्मेदवार बनाएको छ ।
रुकुम पूर्व पुथा उत्तरगंगा
कांग्रेसले यसअघिको स्थानीय तह निर्वाचनमा पराजित भएकी कमलाकुमारी मल्ललाई उम्मेदवार बनाउने भएको छ । मल्ल २०१० मत ल्याउँदा माओवादीबाट भूपेन्द्रा बुढा ४०५९ मत ल्याएर विजयी भएकी थिइन् ।
बस दुर्घटनामा उनको निधन भएपछि उपनिर्वाचन हुन लागेको हो । एमालेले केशकुमारी तुलाचनलाई उम्मेदवार बनाउने निर्णय गरेको छ ।
माओवादीले उत्तरगंगामा ज्ञानदेवी पुनलाई उम्मेदवार बनाएको हो ।
काठमाडौं– १६ मा सबैको नजर
२०७९ वैशाखमा भएको स्थानीय तह निर्वाचनमा काठमाडौं– १६ बाट कांग्रेसका मुकुन्द रिजाल ४०१९ मत ल्याएर विजयी भएका थिए ।
उनको निधन भएपछि उपनिर्वाचन हुन लागेको हो । यसपटक कांग्रेसलाई वडाध्यक्षको उम्मेदवार टुंग्याउन सकस भएको छ । एमालेले भने यहाँ उम्मेदवार तय गरिसकेको छ ।
यी हुन् उपनिर्वाचन हुन लागेका ४४ पद
जिल्ला समन्वय समिति प्रमुख– २
ओखलढुंगा र कैलाली
नगरपालिका प्रमुख १
काठमाडौंको कीर्तिपुर नगरपालिका
नगरपालिका उपप्रमुख–१
जाजरकोटको नलगाड
गाउँपालिका अध्यक्ष– २
मोरङको ग्रामथान
दैलेखको महाबु
गाउँपालिका उपाध्यक्ष– ४
दोलखाको गौरीशङ्कर
हुम्लाको सर्केगाड
बाजुराको स्वामीकार्तिक खापर
रुकुम पूर्वको पुथा उत्तरगंगा
वडाध्यक्ष
ताप्लेजुङको सिरिजङ्गा गाउँपालिका वडा नं ३
झापाको कन्काइ नगरपालिका वडा नं ६
तेह्रथुमको लालीगुराँस नगरपालिका वडा नं ८
सुनसरीको गढी गाउँपलिका वडा नं ६
ओखलढुङ्गाको मोलुङ गाउँपालिका वडा नं ५
उदयपुरको त्रियुगा नगरपालिका वडा नं १२
बेलका नगरपालिका वडा नं ९
सप्तरीको डाक्नेश्वरी नगरपालिका वडा नं १ र ४
धनुषाको धनुषाधाम नगरपालिका वडा नं १
महोत्तरीको रामगोपालपुर नगरपालिका वडा नं २
रौतहटको ईशनाथ नगरपालिका वडा नं ७
राजपुर नगरपालिका वडा नं ६
गढीमाई नगरपालिका वडा नं ८
काठमाडौँको कीर्तिपुर नगरपालिका वडा नं १ र ४
काठमाडौँ महानगरपालिका वडा नं १६
नुवाकोटको ककनी गाउँपालिका वडा नं २
मकवानपुरको हेटौँडा नगरपालिका वडा नं १२
गोरखाको गोरखा नगरपालिका वडा नं ५
गुल्मीको मुसिकोट नगरपालिका वडा नं १
रोल्पाको रुन्टीगढी गाउँपालिका वडा नं ४
बर्दियाको ठाकुरबाबा नगरपालिका वडा नं ४
रुकुम (पूर्वी) पुथा उत्तरगङ्गा गाउँपालिका वडा नं २
कपिलवस्तु शुद्धोधन गाउँपालिका वडा नं १
दैलेखको दुल्लु नगरपालिका वडा नं १३
कालिकोटको तिलागुफा नगरपालिका वडा नं ४
जाजरकोट कुशे गाउँपालिका वडा नं ७
डोल्पाको त्रिपुरासुन्दरी नगरपालिका वडा नं ५
रुकुम (पश्चिम) सानीभेरी गाउँपालिका वडा नं ५
बझाङको सुर्मा गाउँपालिका वडा नं ४
डोटीको पूर्वीचौकी गाउँपालिका वडा नं ६
दार्चुलाको दुहुँ गाउँपालिका वडा नं ५
कञ्चनपुरको भीमदत्त नगरपालिका वडा नं ६
