२८ असार २०८३, आइतबार
सहकारी संस्थाको रकम अपचलन प्रकरणमा पक्राउ परेका नेपाल प्रहरीका पूर्व डीआईजी छविलाल जोशी बञ्जाडेलाई कास्की पठाइएको छ ।
गोरखा मिडिया नेटवर्कका पूर्व सञ्चालक समेत रहेका जोशीको बिहीबार जिल्ला सरकारी वकिल कार्यालयमा बयान सकिएपछि शुक्रबार साँझ जिल्ला प्रहरी कार्यालय कास्की पठाइएको हो ।
सूर्यदर्शन सहकारीको रकम अपचलन गरेको आरोपमा पक्राउ परेका जोशीविरुद्ध काठमाडौंको कालीमाटीस्थित स्वर्णलक्ष्मी बहुउद्देश्यीय सहकारी संस्थाको बचत रकम अपचलन गरेको आरोप छ ।
जोशीलाई स्वर्णलक्ष्मी सहकारी ठगी प्रकरणमा गत मंगलबार काठमाडौं झिकाइएको थियो ।
जिल्ला प्रहरी परिसर काठमाडौंका प्रमुख एसएसपी वसन्त रजौरेका अनुसार सरकारी वकिल कार्यालय काठमाडौंमा छविको बयान सकिएपछि उनलाई कास्की पठाइएको हो ।
यही प्रकरणमा जोडिएका राष्ट्रिय स्वतन्त्र पार्टीका सभापति रवि लामिछाने पनि यतिबेला कास्की प्रहरीको हिरासतमा छन् । उनी कात्तिक २ गते काठमाडौंबाट पक्राउ परेका थिए ।
स्वर्णलक्ष्मी सहकारी प्रकरणमा लामिछानेविरुद्ध पनि पक्राउ पुर्जी जारी भएको छ । कास्कीले रविविरुद्ध गरेको अनुसन्धानका लागि अदालतबाट म्याद लिएको १३ दिन आइतबार सकिँदैछ । म्याद थपको अवस्था हेरेर उनलाई पनि काठमाडौं झिकाइने जानकारी एसएसपी रजौरेले दिए ।
जीबी राई र रवि लामिछानेका नाममा २०७८ पुस १ मा ‘इको सेभेन सिटर भ्यान’ किन्न भन्दै स्वर्णलक्ष्मीबाट ४६ लाख ८८ हजार रुपैयाँ ऋण लिएका खुलेको छ ।
भ्यान किन्न भनेर लगेको कर्जामध्ये २९ लाख ५२ हजार ४ सय ३६ रुपैयाँ तिर्न बाँकी देखिएको अनुसन्धानबाट खुलेको छ ।
यही प्रकरणमा जोडिएका कुमार रम्तेलसँग केही दिन पहिले बयान लिएर पोखरा पठाइएको छ । रवि र छविसहित १० जनाविरुद्ध बुधबार जिल्ला प्रहरी कार्यालय चितवनमा समेत पूरक जाहेरी परेको छ ।
