०६ साउन २०८३, बुधबार
रुपन्देहीको बुटवल उपमहानगरपालिका–१४ बेलभरियास्थित न्यौपाने परिवारमा मंगलबार ठूलो बज्रपात पर्यो ।
भारतको जम्मू-कश्मीरको पहलगाममा आतंकवादी समूहले गरेको आक्रमणमा बेलभरियाका सुदीप न्यौपानेसहित २६ जनाको मृत्यु भएपछि यतिबेला बेलभरिया शोकमा डुबेको छ ।
२७ वर्षीय सुदीप कलेजको बिदा पारेर आमा र अरु नातेदारसहित कश्भीर घुम्न गएका थिए भने, बुवा ध्रुव न्यौपाने काठमाडौंमा जारी शिक्षक आन्दोलनमा सहभागी थिए ।
काठमाडौंमा शिक्षक हकहित र अधिकारका लागि ध्रुव लडिरहँदा कश्मीरमा छोरा सुदीप आतंकवादीको आक्रमणमा अस्ताए । ध्रुव बुटवल–१९ स्थित मोतीपुर माध्यमिक विद्यालयका प्रावि तहका स्थायी शिक्षक हुन् ।
घटनामा सुदीपकी आमा, बहिनी र ज्वाइँ भने भागेर बाँच्न सफल भए । भाग्ने क्रममा आमा सामान्य घाइते भएकी छन् ।
छोरा आफन्तसहित भारत घुम्न गएको ध्रुवलाई थाहा नभएको सोही विद्यालयका सहप्राचार्य भरत अधिकारीले जानकारी दिए । घटनाको खबर पाउने बित्तिकै ध्रुव अर्धबेहोस भए । काठमाडौंबाट फर्किएका उनी बुधबार बेलुका बेलभरिया पुगेका छन् ।
परिवारका एक्ला छोरा सुदीप धरान बसेर पढिरहेका थिए । उनले जनस्वास्थ्यमा स्नातक अध्ययन गरिसकेका थिए ।
उनीहरू शनिबार बेलुका बुटवलबाट दिल्लीका लागि छुट्ने नेपाल-भारत मैत्री बस सेवाको लु २ ख ६६३४ नम्बर बसमा इँटाभट्टीबाट टिकट काटेर चढेका थिए । दिल्लीसम्म बसमा गएपछि त्यहाँबाट उनीहरू जहाजमा कश्मीर पुगे ।
यो पनि पढ्नुहोस्- आमा र दिदीभिनाजुसहित कश्मीर घुम्न पुगेका थिए बुटवलका सुदीप, धर्म सोधेर गोली प्रहार
उनीहरू पहलगाममा पुगेर घुमफिर गरिरहेकै अवस्थामा बन्दुकधारी आतंकवादीहरूले मंगलबार दिउँसो एक्कासी गोली चलाए । घटनामा सुदीपको ज्यान गएकोबारे आफन्तले त्यहीँबाट म्यासेन्जरमा नेपालमा रहेका नातेदार बुटवल-१४ का वडाध्यक्ष दधिराम न्यौपानेलाई जानकारी गराएका थिए ।
‘हिउँ खेल्ने ठाउँमा एक्कासी आएर बन्दुकधारीले कुन धार्मिक समूहको हो ? भन्दै सोधेर गोली हानेपछि सुदीपको ज्यान गएको हो भन्ने छ, धेरै कुरा थाहा भएन’, वडाध्यक्ष न्यौपानेले भने ।
सुदीपका आमा–बुवाको सम्बन्ध विच्छेद भएपछि उनी बुटवल–११ कालिकानगरमा बस्दै आएका थिए । त्यसअघि उनीहरूको घर बुटवल–१४ बेलभरियामा थियो । सुदीपको पुर्ख्यौली घर भने पाल्पाको बगनासकाली गाउँपालिका वडा नम्बर ४ हो ।
उनीहरू २०२४ सालमै बसाइँ सरेर बुटवल आएको बेलभरियाका थानेश्वर पौडेलले बताए । ‘घुम्न गएका निर्दोष व्यक्तिको ज्यान गएपछि बेलभरिया गाउँ शोकमग्न भएको छ’, पौडेलले भने । सुदीपको सवारी लाइसेन्स समेत घटनास्थलमा भेटिएको भारतीय सञ्चारमाध्यमले जनाएका छन् ।
सुदीपको ‘हत्या’ घटनापछि बुटवल उपमहानगरपालिकाले घोर भर्त्सना व्यक्त गरेको छ । उपहानगरपालिकाका प्रमुख खेलराज पाण्डेयले बुधबार विज्ञप्ति जारी गर्दै घटनाबाट नगरपालिका स्तब्ध भएको उल्लेख गरेका छन् ।
घटनापछि सुदीपका मामा बुटवल-१२ निवासी महाशर्मा पाण्डेसँग नियमित सम्पर्कमा रहेको र आवश्यक सहजीकरणका लागि पहल गरिरहेको नगर प्रमुख पाण्डेयले बताएका छन् ।
‘आतंकवादी हमलामा भ्रमणका लागि गएका निर्दोष नागरिकहरूको ज्यान गएकोमा हामीलाई अत्यन्त दुःख लागेको छ र यो घटनाप्रति हामी घोर भर्त्सना गर्दछौं’, नगर प्रमुख पाण्डेले भनेका छन्, ‘घटनामा परी ज्यान गुमाउनेका परिवारप्रति हामी गहिरो समवेदना व्यक्त गर्दछौं र घाइतेहरूको शीघ्र तथा पूर्ण स्वास्थ्यलाभको हार्दिक कामना गर्दछौं । साथै, सो घटनामा ज्यान गुमाउने सुदीपको परिवारलाई राहत र क्षतिपूर्तिको व्यवस्था दिलाउन तथा आक्रमणमा परी घाइते भएकाहरूको उपचार र राहतको व्यवस्था गर्नका लागि नेपाल सरकारसँग माग गर्दछौं ।’
हमलाविरुद्ध एकजुट दुई देशका प्रधानमन्त्रीको प्रतिबद्धता
घटनापछि बुधबार नेपालका प्रधानमन्त्री केपी शर्मा ओलीले भारतीय समकक्षी नरेन्द्र मोदीसँग टेलिफोन वार्ता गर्दै जम्मू-कश्मीरको पहलगाममा भएको आतंकवादी हमलाको विरुद्धमा एकजुट हुने प्रतिबद्धता व्यक्त गरेका छन् ।
भारतीय परराष्ट्र मन्त्रालयका प्रवक्ता रणधीर जैसवालले सामाजिक सञ्जाल एक्समा एक पोस्ट गर्दै दुवै नेताबीच आतंकवादविरुद्ध एकजुट हुने सहमति भएको जनाएका छन् ।
भारतीय विदेश प्रवक्ता जैसवालका अनुसार नेपालका प्रधानमन्त्री ओलीले फोन संवादका क्रममा जम्मू-कश्मीरको पहलगामस्थित बैसारन मिडोजमा भएको आतंकवादी हमलाको निन्दा गरेका थिए ।
फोन संवादका क्रममा भारतीय प्रधानमन्त्री मोदीले उक्त हमलामा नेपाली नागरिक सुदीपको मृत्यु भएकोमा दु:ख व्यक्त गरे ।
‘प्रधानमन्त्री मोदीले यो दु:खद् घटनाका दोषीहरूलाई कडा कारबाही गरिने र आतंकवादविरुद्धको लडाइँमा भारत अडिग रहेको कुरा स्पष्ट पार्नुभयो’, जैसवालले लेखेका छन् ।
यो हमलालाई जम्मू-कश्मीरमा हालसालैका वर्षमा भएको सबैभन्दा घातक हमलामध्ये एक मानिएको छ । हमलाको जिम्मेवारी लश्कर-ए-ताइबासँग सम्बद्ध ‘द रेसिस्टेन्स फ्रन्ट’ले लिएको छ।
आतंकवादी हमलापछि प्रधानमन्त्री मोदीले साउदी अरबको भ्रमण छोट्याएर तत्काल भारत फर्किएका छन् ।
