०७ साउन २०८३, बिहीबार
अमेरिका इरानमाथि आक्रमण गरेर २२ वर्षपछि सिधै युद्धमा हाम फालेको छ। यसलाई अपरेशन मिडनाइट ह्यामर नाम दिइएको थियो। यसअघि, यसले अन्तिम पटक २००३ मा इराक युद्धमा भाग लिएको थियो । अमेरिकी सेनाहरू अझै पनि इराकमा छन् । इराक युद्धमा अमेरिकाले दुई ट्रिलियन डलर खर्च गरेको थियो ।
इराक युद्धअघि,अमेरिकाले २००१ मा अफगानिस्तान युद्धमा अल-कायदा र तालिबानविरुद्ध लडेको थियो। जुन अमेरिकाले लडेको सबैभन्दा लामो युद्ध थियो। अमेरिका २०२१ मा अफगानिस्तानबाट फर्किएको थियो । यद्यपि, अमेरिकाले अप्रत्यक्ष रूपमा यमन, लिबिया, सिरिया र सोमालियामा आक्रमण गरेको छ।
अमेरिकी विदेश विभागले इरानमा अमेरिकी आक्रमणपछि चेतावनी जारी गर्दै विदेशमा अमेरिकी नागरिकहरूविरुद्ध विरोध प्रदर्शन हुन सक्ने बताएको छ । मन्त्रालयले इजरायल र इरान बीचको तनावका कारण मध्य पूर्वमा यात्रा गर्न कठिनाइ भइरहेको छ र हवाई क्षेत्र धेरै पटक बन्द गरिएको जनाएको छ । विदेश मन्त्रालयले विश्वभरका अमेरिकी नागरिकहरूलाई थप सतर्क रहन सल्लाह दिएको छ।
इजरायल-इरान द्वन्द्व १० दिनदेखि जारी छ । दुई देशबीचको युद्धमा आइतबार अमेरिका पनि सामेल भएपछि तनाब थप बढेको हो । इजरायली वायुसेनाले आइतबार राति इरानको शाहरुदमा रहेको ब्यालिस्टिक मिसाइल इन्जिन कारखानामा बम विस्फोट गराएको थियो। यो ठाउँ इजरायलबाट करिब २००० किलोमिटर टाढा छ।
आक्रमणमा धेरै इन्जिन बनाउने मेसिन र आवश्यक उपकरणहरू नष्ट भएको अन्तर्राष्ट्रिय सञ्चार माध्यमहरूले जनाएका छन् । यसबाहेक इजरायलले तेहरान, केरमानशाह र हमादानमा पनि हवाई हमला गरेको थियो।
अमेरिकाले हिजो इरानमा ३ वटा आणविक अड्डाहरूमा आक्रमण गरेर युद्धमा प्रवेश गरेको थियो । यी अड्डाहरू फोर्डो, नातान्ज र इस्फहान थिए । यस अपरेशनमा ७ वटा बी-२ स्टिल्थ बमवर्षकहरूले भाग लिएका थिए, जसले इरानको फोर्डो र नातान्ज आणविक अड्डाहरूमा १३ हजार ६०८ किलोग्राम तौलका बंकर बस्टर बम खसालेका थिए।
इजरायली सेनाले इरानबाट क्षेप्यास्त्र प्रहार गरिएको बताएको छ। राजधानी तेल अभिभसहित धेरै ठाउँमा रक्षा प्रणाली सक्रिय गरिएको छ।
खामेनीले भने - इजरायलले ठूलो गल्ती गर्यो, सजाय दिइनेछ
इरानका सर्वोच्च नेता अयातुल्लाह अली खामेनीले इजराय विरुद्ध सैन्य कारबाही जारी राख्ने बताएका छन् । उनले भने कि 'इजरायली शत्रुले ठूलो गल्ती र अपराध गर्यो उसलाई सजाय दिनुपर्छ र अहिले सजाय दिइँदैछ।'
इजरायली प्रधानमन्त्री बेन्जामिन नेतान्याहूले इजरायलसँग इरानको ४०० किलोग्राम ६० प्रतिशत समृद्ध युरेनियमबारे गोप्य जानकारी रहेको बताएका छन् ।
नेतान्याहूले भने कि सेप्टेम्बर २०२४ मा हिज्बुल्लाह नेता हसन नसरल्लाहको हत्यापछि इरान आणविक हतियार बनाउने दिशामा द्रुत गतिमा अघि बढिरहेको थियो, त्यसैले इजरायलले कारबाही गर्नुपर्यो। उनले यो पनि भने कि इरानले हरेक महिना ३०० ब्यालिस्टिक मिसाइल बनाउने योजना बनाइरहेको थियो।
नेतान्याहूले खतराबारे अमेरिकी राष्ट्रपति डोनाल्ड ट्रम्पसँग कुरा गरेका थिए। गाजा युद्धको बारेमा बोल्दै नेतान्याहूले भने - 'युद्ध भोलि समाप्त हुन सक्छ। यदि हमासले आफ्नो हतियार राख्यो र सबै बन्धकहरूलाई रिहा गर्यो भने।'
