इङ्लिस प्रिमियर लिग क्लब लिभरपुलका प्रभावशाली फरवार्ड डियोगो जोटाको निधन भएको छ ।

सवारी दुर्घटनामा परी २८ वर्षको उमेरमा उनको निधन भएको समाचारमा जनाइएको छ ।

उनी पोर्चुगलको राष्ट्रिय टोलीका सदस्य पनि थिए । उनको कार दुर्घटनामा परेको थियो । स्पेनको जामोरामा भएको दुर्घटनामा डियोगो जोटाका भाइ आन्द्रे सिल्भाको पनि निधन भएको बताइएको छ ।​

डियोगो जोटाका भाइ २६ वर्षीय आन्द्रे सिल्भा पनि व्यावसायिक फुटबल खेलाडी थिए । उनी पोर्चुगलको दोस्रो डिभिजनको क्लब पेनाफिलबाट व्यावसायिक फुटबल खेल्थे ।​

डियोगो जोटा गत महिनामात्र वैवाहिक बन्धनमा बाँधिएका थिए । उनले लामो समयदेखिकी आफ्नी प्रेमिका रहेकी रुट कार्डोसोसँग विवाह गरेका थिए ।​

डियोगो जोटा र रुट कार्डोसोका तीनजना सन्तान छन् । केही समयअघि लिभरपुललाई इङ्लिस प्रिमियर लिगको उपाधि चुमाउन जोटाले पनि महत्त्वपूर्ण योगदान गरेका थिए । गत जुनमा उनले पोर्चुगललाई नेशन्स लिगको उपाधि पनि दिलाएका थिए ।