०२ साउन २०८३, शनिबार
उद्योगसँगै राजनीतिमा पनि सक्रिय भैरहवाकी पुनमकुमारी अग्रवाल राष्ट्रिय स्वतन्त्र पार्टी (रास्वपा)बाट प्रतिनिधि सभा सदस्य पदको उपनिर्वाचनमा उम्मेदवार आकांक्षी छन् । बिहीबार रास्वपाले सार्वजनिक गरेको ९ जना आकांक्षीमा पुनमको नाम पनि छ । पार्टीले अनलाइन आवेदन माग गरेर उम्मेदवारहरूको सर्टलिस्ट सार्वजनिक गरेको हो । सबै प्रक्रिया पुर्याएर रास्वपाले उम्मेदवार टुंग्याउने छ ।
आगामी कार्तिक १७ गते हुने रुपन्देही क्षेत्र नम्बर ३ को उपनिर्वाचन रास्वपासहित सबै दलहरूले प्रतिष्ठाको विषय बनाएका छन् । रास्वपाले सार्वजनिक गरेको ९ जना आकांक्षीको सूचीमा मधेशी मूलकी महिलाबाट पुनम एक्लो दाबेदार हुन् ।
पुनम निकटका अनुसार उनी विगत दुई वर्षदेखि पार्टी सदस्य भएर काम गरिरहेकी छिन् । उनले पार्टी सिद्धार्थनगरको नगर सचिवसमेत भएर काम गरेकी छन् । पार्टीको विधानसँगै राष्ट्रिय तथा अन्तर्राष्ट्रिय नीतिसमेत उनले अध्ययन गरेकी छन् ।
पुनमले लामो समयदेखि मुलुकको राजनीति, नेतृत्व र विधिबारे अध्ययन गरेको उनी निकटहरू बताउँछन् । ‘हाम्रो पार्टीले अघि सारेका एजेण्डा र मुलुकको विकासप्रतिको स्पष्ट दृष्टिकोणका कारण उहाँले रास्वपा रोज्नुभएको हो,’ रास्वपा सिद्धार्थनगरका एक स्थानीय नेताले भने, ‘पुनमजी योग्य हुनुहुन्छ, उहाँसँग उपनिर्वाचनको नतिजा आफ्नो पक्षमा पार्न सक्ने क्षमता छ । तर, पार्टीको कुरा हो, कसले टिकट पाउँछ भन्न सकिँदैन ।’ उनी यसअघि सिद्धार्थनगरको प्रमुख (मेयर)मा समेत उम्मेदवार बनेकी थिइन् ।
रुपन्देही क्षेत्र नम्बर ३ का मतदाताको मात्रै नभई आफूले समग्र जिल्लाको सम्भावना बुझेको पुनमले बताइन् । ‘रुपन्देही क्षेत्र नम्बर ३ का मतदाताको मात्रै होइन मैले समग्र जिल्लाको सम्भावना बुझेकी छु,' पुनमले भनिन्, 'यहाँका समस्यासँग परिचित छु, समस्या समाधानका उपाय पनि बुझेकी छु । यसैले मैले रास्वपाबाट उपनिर्वाचन लड्न चाहेकी हुँ ।’
आफूले राजनीतिलाई पेसा नभई सेवा ठान्ने उनले बताइन् । उनी युवा उद्यमीसमेत हुन् । ‘राष्ट्रिय पुँजीको विकास र रोजगारी सिर्जना गर्दै मुलुकको समृद्धिमा टेवा पुर्याउन निरन्तर लागेकी छु । उद्यमसँगै मैले राजनीतिलाई निरन्तरता दिँदै रास्वपाको अभियानमा लागेकी छु,’ उनले भनिन्, ‘हाम्रो परिवारको लगानीमा रुपन्देहीमा नेपालमै पहिलो ग्रोमोर दानेदार अर्ग्यानिक मल उद्योग सञ्चालित छ । यसँगै अन्य व्यवसायीक फर्ममा समेत लगानी गरी रोजगारी सिर्जनामा लागेकी छु । तर, राजनीति छोडेकी छैन ।’
उनले मेडिकल बायोलोजीमा स्नातकोत्तर (डिग्री) अध्ययन गरेकी छन् । उनले केही समय भैरहवा मेडिकल कलेज र देवदह मेडिकल कलेजमा अध्यापन समेत गराएकी थिइन् । उनी नेपाल–भारत मैत्री केन्द्रको केन्द्रीय कमिटी सदस्यसमेत हुन् ।
यसबाहेक विभिन्न सामाजिक संघसंस्थासँग जोडिएर समाजसेवा पनि गर्दै आएकी छन् । उनले ठूला दलका नेताका कारण मुलुक जर्जर अवस्थामा पुगेको सुनाइन् । ‘मुलुकमा भ्रष्टाचार र कुशासन व्यप्त छ,’ उनले भनिन्, ‘मुलुकको सम्भावना, विकास र समृति तथा राजनीतिक प्रतिशोधबारे हाम्रो पार्टीले उठाएका एजेण्डालाई थप स्थापित गर्न म उपनिर्वाचनमा उम्मेदवार बन्ने आकांक्षा राखेकी हुँ ।’
जनताको मनोभावना, विकास, सम्भावना र समस्यासँग परिचित भएकाले पनि आफू मख्उ दाबेदार भएको उनको भनाइ छ । ‘मेरो दाबी हो, बाँकी कुरा पार्टीले डिसिजन गर्ला,’ उनले भनिन् ।
मिश्रित समुदायको बसोबास र व्यापारिक थलोसमेत रहेको रुपन्देही-३ मा मधेशी समुदायको बाहुल्यता छ ।
