युक्रेनका राष्ट्रपति भोलोदिमिर जेलेन्स्कीले रूसी राष्ट्रपति भ्लादिमिर पुटिनले मस्कोमा वार्ताका लागि आउन गरेको प्रस्ताव अस्वीकार गरेका छन् । अमेरिकी टेलिभिजन एबीसी न्यूजसँगको अन्तर्वार्तामा राष्ट्रपति जेलेन्स्कीले आफ्नो देशमा दैनिक मिसाइल आक्रमण भइरहेकोले आफू रुसको राजधानी मस्को जान नसक्ने बताएका हुन् । 

उनले रुसी राष्ट्रपति पुटिन आफैं युक्रेन आउन सक्ने विकल्प दिएका छन् । जेलेन्स्कीले पुटिनलाई वास्तवमा शान्ति र वार्ता चाहेको नभई समय लम्ब्याउने खेल खेलिरहेको आरोपसमेत लगाए । यसअघि पुटिनले यदि जेलेन्स्की तयार भए मस्को आउन सक्ने र वार्ता हुन सक्ने बताएका थिए । 'उनी कीभ आउन सक्छन्,' जेलेन्स्कीले भने, 'मेरो देश हरेक दिन क्षेप्यास्त्र आक्रमणमा परेको बेला मस्को जान सक्दिनँ । म यो आतंकवादीको राजधानी जान सक्दिन ।'

यसअघि आइतबार मात्रै रुसले पहिलोपटक युक्रेनी सरकारी भवनमा आक्रमण गरेको थियो । रातभरको आक्रमणमा रुसले आठ सय पाँच ड्रोन र १३ वटा मिसाइल प्रहार गरेको युक्रेनको आरोप छ । युक्रेनी अधिकारीहरूका अनुसार आक्रमणमा कम्तीमा दुई जनाको ज्यान गएको छ भने २० जना घाइते भएका छन् ।
यससँगै युक्रेनविरुद्ध रूसको आक्रमणमा नयाँ मोड लिएको बीबीसीले विश्लेषण गरेको छ । अहिलेसम्म युक्रेनमा कुनै पनि सरकारी भवनमा रुसी आक्रमण भएको थिएन । किभको केन्द्र धेरै सुरक्षित मानिन्छ र यहाँ वायु रक्षा तैनाती सुरुदेखि नै बलियो छ । त्यसैले, यो आक्रमणले मानिसहरूलाई स्तब्ध बनाएको समाचारमा उल्लेख छ । 

यसैबीच, अमेरिकी राष्ट्रपति ट्रम्पले शान्ति सम्झौताको मध्यस्थता गर्ने आफ्नो प्रयासमा दुई नेताहरू बीचको बैठकलाई प्राथमिकता दिएका छन् । 'अन्ततः म ती दुईलाई एउटा कोठामा राख्नेछु,' उनले फक्स न्यूजलाई भनेका छन् ।

ट्रम्पले गत महिना अलास्कामा पुटिनसँगको आफ्नो शिखर सम्मेलनको लक्ष्य अमेरिका, रुस र युक्रेनका नेताहरू बीचको त्रिपक्षीय बैठक बनाएका थिए र पछि युक्रेनी नेता ह्वाइट हाउस आएपछि पुटिन र जेलेन्स्की बीचको द्विपक्षीय बैठक हुने बताएका थिए । तर, हालसम्म उक्त वार्ता हुन सकेको छैन । 

पुटिन र जेलेन्स्की बीचको द्विपक्षीय वार्ता हुन नसकिरहेका बेला ट्रम्पले रुसमाथि दोस्रो चरणको प्रतिबन्ध लगाउनेबारे कुरा गरेका छन् । आइतबार सञ्चारकर्मीले रुसमाथि अर्को चरणको प्रतिबन्ध लगाउन तयार हुनुहुन्छ ? भनेर सोध्दा ट्रम्पले छोटो जवाफ दिए र भने, 'हो, म तयार छु।'

यद्यपि, उनले नयाँ प्रतिबन्धहरू कहिले र कसरी लागू हुनेछन् भन्ने कुरा स्पष्ट पारेनन् । यदि यी प्रतिबन्धहरू लगाइए भने तिनीहरूले रूसको तेल आपूर्ति, बैंकिङ क्षेत्र र छायाँ फ्लीटलाई असर गर्न सक्ने सीएनएनले जनाएको छ ।

तस्वीरहरू : एपी