मतादाताहरूले अब मतपत्रमा उम्मेदवारको रंगीन तस्वीर देख्न पाउने भएका छन् । 

निर्वाचन आयोगले मतपत्रलाई अझै स्पष्ट, पठनीय र मतदातामैत्री बनाउन हालसम्म प्रयोग हुँदै आएका मार्गदर्शन संशोधन गरेको हो । यो भौतिक मतपत्रमा नभएर विद्युतीय भोटिङ मेसिनमा हुने मतपत्रमा गरिएको परिवर्तन हो ।

आयोगले सन् १९६१ को निर्वाचन सञ्चालन नियमावलीको नियम ४९ (बी) अन्तर्गतका निर्देशनमा संशोधन गरेको हो । यो खबर छिमेकी देश भारतको हो ।

भारतको निर्वाचन आयोगले संशोधन गरेको यो कार्यविधि बिहारमा अब हुन लागेको विधानसभा निर्वाचनबाटै लागू गर्ने तयारी गरेको छ । 

निर्वाचन प्रक्रियालाई सुधार गर्न आयोग लगातार नयाँ पहल गर्दै आएको छ । पछिल्ला ६ महिनामै आयोगले २८ वटा नयाँ कदम चालेको छ । 

यस क्रममा एसआईआरसम्बन्धी मुद्दामा विवाद पनि भएको थियो । अब आयोगले ईभीएम (इलेक्ट्रोनिक भोटिङ मेसिन) मतपत्रसम्बन्धी ठूलो निर्णय गरेको हो । अबदेखि उम्मेदवारहरूको रंगीन तस्वीर मतपत्रमा छापिनेछ । तस्वीर स्पष्ट देखिनका लागि यसको तीन चौथाइ भागमा अनुहार देखिने व्यवस्था गरिएको छ ।

यसले मतदाताले उम्मेदवार सजिलै चिन्न सक्ने आयोगले जनाएको छ ।

उम्मेदवार र क्रम संख्या भारतीय अंकहरूको अन्तर्राष्ट्रिय स्वरूपमा छापिनेछ । फन्टको आकार ३० रहनेछ र बोल्डमा लेखिनेछ । 

साथै, सबै उम्मेदवार र माथिका कुनै पनि होइन भन्ने विकल्पको नाम एउटै फन्ट प्रकार र एउटै आकारमा रहनेछ, जसले सजिलै पढ्न सकिनेछ ।